Gujarat: గుర్రంపై ఊరేగింపు.. దళిత వరుడిపై దాడి

గాంధీనగర్‌: వివాహ తంతులో భాగంగా గుర్రంపై ఊరేగింపుగా వెళుతున్న ఒక దళిత వరుడిపై కొందరు దాడి చేశారు. గుజరాత్‌లోని గాంధీనగర్‌ జిల్లాలో ఈ సంఘటన చోటుచేసుకుంది. పోలీసులు నలుగురిపై కేసు నమోదు చేసి అరెస్టు చేశారు. కులం పేరుతో తిట్టడమే కాకుండా కొట్టారని బాధితుడు ఫిర్యాదులో పేర్కొన్నాడు.  

వికాస్‌ చడ్వా తన వివాహ తంతులో భాగంగా సుమారు 100 మంది బంధువుల సమక్షంలో ఊరేగింపుగా వధువు ఇంటికి బయలుదేరాడు. ఈక్రమంలో ద్విచక్రవాహనంపై వచ్చిన ఓ వ్యక్తి వరుడిని కులంపేరుతో దూషిస్తూ అతడిని అడ్డుకున్నాడు. గుర్రంపై నుంచి బాధితుడిని లాగి చెంపపై కొట్టాడు. తమ కులానికి చెందిన వారు మాత్రమై గుర్రంపై ఊరేగాలని తిట్టాడు. కొద్దిసేపటి తర్వాత మరోముగ్గురు వ్యక్తులు నిందితుడికి మద్దతుగా వచ్చి బాధితుడితో గొడవపడి బెదిరించారు. గుర్రం దిగి వాహనంలో వధువు ఇంటికి వెళ్లాలని ఒత్తిడి తెచ్చారు. దీంతో బాధితుడి బంధువు మన్సా పోలీసులకు ఫిర్యాదు చేశాడు. నిందితులు శైలేజ్‌ ఠాకూర్‌, జయేశ్‌ ఠాకూర్‌, సమీర్‌ ఠాకూర్‌, అశ్విన్‌ ఠాకూర్‌పై పోలీసులు ఐపీసీ సెక్షన్లు 341, 323, 504, 114, 506 (2) కింద కేసు నమోదు చేసి అరెస్టు చేశారు.