Defence: ‘రక్షణ’ తయారీలో భారత్‌ రికార్డు.. తొలిసారి రూ.లక్ష కోట్లు దాటిన ఉత్పత్తి!

దిల్లీ: రక్షణ ఉత్పత్తుల తయారీ (Defence Production)లో భారత్‌ రికార్డు సృష్టించింది. తొలిసారిగా 2022- 23 ఆర్థిక సంవత్సరంలో రూ.లక్ష కోట్లకుపైగా విలువైన రక్షణ ఉత్పత్తులను తయారు చేసింది. ప్రస్తుతం ఉత్పత్తుల విలువ రూ.1.06 లక్షల కోట్లుగా ఉండగా.. ఇంకా మరికొన్ని ప్రయివేటు రక్షణ సంస్థల నుంచి డేటా వస్తే మరింత పెరుగుతుందని కేంద్రం ఓ ప్రకటనలో తెలిపింది. స్వావలంబనే లక్ష్యంగా.. రక్షణ శాఖ (Defence Ministry) స్థిరమైన ప్రయత్నాలతో ఈ రికార్డు సాధ్యమైందని పేర్కొంది.

ఇదిలా ఉండగా.. 2022- 23 ఆర్థిక సంవత్సరంలో నమోదైన రక్షణ ఉత్పత్తుల విలువ.. 2021-22లోని రూ.95 వేల కోట్లతో పోలిస్తే 12 శాతానికిపైగా అధికం కావడం విశేషం. రక్షణ రంగం ఎదుర్కొంటున్న సవాళ్లను అధిగమించేందుకు, వాటికి పరిష్కార మార్గాలను కనుగొనేందుకు తమ శాఖ నిరంతరం పని చేస్తోందని రక్షణ శాఖ మంత్రి రాజ్‌నాథ్‌ సింగ్‌ వెల్లడించారు. ఈ మేరకు శుక్రవారం ఆయన ఓ ట్వీట్‌ చేశారు.

‘సూక్ష్మ, చిన్న, మధ్యతరహా పరిశ్రమలు, స్టార్టప్‌ల ఏకీకరణతో సహా రక్షణ రంగంలో వ్యాపారాన్ని సులభతరం చేసేందుకు కేంద్రం పలు సంస్కరణలు ప్రవేశపెట్టింది. దీంతోపాటు గత 7-8 ఏళ్లలో ప్రభుత్వం ద్వారా పరిశ్రమలకు జారీ అయిన రక్షణ లైసెన్సుల సంఖ్యలో దాదాపు 200 శాతం పెరుగుదల ఉంది. ఈ చర్యలు దేశంలోని రక్షణ పారిశ్రామిక ఉత్పాదక వ్యవస్థకు ప్రోత్సాహాన్ని అందించాయి. ఉపాధి అవకాశాలను సృష్టించాయి’ అని కేంద్రం తెలిపింది.