Mahua Moitra: మహువాపై ఆరోపణలు.. ఆ వ్యాపారవేత్త అఫిడవిట్ అందింది: ఎథిక్స్‌ కమిటీ

దిల్లీ: ప్రముఖ పారిశ్రామికవేత్త గౌతమ్‌ అదానీ లక్ష్యంగా పార్లమెంటులో ప్రశ్నలడగటానికి తృణమూల్ కాంగ్రెస్ ఎంపీ మహువా మొయిత్రా(Mahua Moitra)కు డబ్బులు చెల్లించినట్లు మరో వ్యాపారవేత్త దర్శన్‌ హీరానందాని ఆరోపణలు ఎదుర్కొంటున్నారు. ఓ అఫిడవిట్‌లో దర్శన్‌ ఆ విషయాలను అంగీకరించినట్లు వార్తా కథనాలు వెలువడ్డాయి. ఇప్పుడు ఆ ఆఫిడవిట్‌ తమకు అందినట్లు లోక్‌సభ ఎథిక్స్‌ కమిటీ శుక్రవారం వెల్లడించింది.

‘దర్శన్ హీరానందాని అఫిడవిట్‌ మాకు అందింది. ఈ ఆరోపణలు తీవ్రమైనవి. భాజపా ఎంపీ నిషికాంత్ దూబే (Nishikant Dubey)చేసిన ఫిర్యాదును ఎథిక్స్ కమిటీ అక్టోబర్ 26 విచారిస్తుంది. ఆ రోజున ఆయన తన ఆరోపణలకు సంబంధించిన ఆధారాలను సమర్పించాలి. మొదట మేం దూబే రాసిన లేఖ, హీరానందాని అఫిడవిట్‌ను పరిశీలిస్తాం. ఆ తర్వాత మొయిత్రా వాదన వింటాం’ అని ఎథిక్స్‌ కమిటీ ఛైర్మన్ వినోద్‌ సోంకార్‌ జాతీయ మీడియాకు వెల్లడించారు.

ఒత్తిడి చేసి, సంతకం చేయించారు: ట్విటర్‌లో మహువా సంచలన ఆరోపణ

ఇదిలా ఉంటే.. తనపై వస్తోన్న ఆరోపణలను మొయిత్రా తీవ్రంగా ఖండిస్తున్నారు. తాను ఎలాంటి విచారణకు అయినా సిద్ధమేనన్నారు. ఈ లోపు అవాస్తవాలు ప్రచారం కాకుండా నిషేధం విధించాలని డిమాండ్ చేశారు. ‘ఎథిక్స్ కమిటీ ఛైర్మన్ ఒకసారి లోక్‌సభ నిబంధనలను పరిశీలించాలి. ఆ అఫిడవిట్ మీడియాకు ఎలా లీక్‌ అయింది..? ఆ లీక్‌పై ఛైర్మన్‌ మొదట విచారణ చేపట్టాలి. నేను మళ్లీ చెప్పేది ఒకటే మాట. అదానీ అంశంపై మాట్లాడకుండా నన్ను లోక్‌సభ నుంచి బహిష్కరించడమే భాజపా ఏకైక లక్ష్యం’ అని తాజాగా ట్వీట్ చేశారు.