రెండో విడత స్వచ్ఛభారత్‌కు కేబినెట్‌ ఆమోదం

దిల్లీ: ప్రధాని నరేంద్రమోదీ ప్రతిష్ఠాత్మకంగా తలపెట్టిన గ్రామీణ స్వచ్ఛభారత్‌ మిషన్‌ రెండో విడత కార్యక్రమానికి కేంద్ర కేబినెట్‌ బుధవారం ఆమోదం తెలిపింది. ఈ మేరకు కేంద్ర జల్‌ శక్తి మంత్రిత్వ శాఖ ఓ ప్రకటనలో తెలిపింది. ‘రెండో విడత స్వచ్ఛభారత్‌ మిషన్‌కు కేంద్ర కేబినెట్‌ ఆమోదం తెలిపింది. రెండో విడత కార్యక్రమం 2020-21 నుంచి 2024-25 వరకు కొనసాగుతుంది. ఇందుకోసం కేంద్ర, రాష్ట్ర ప్రభుత్వాలు రూ.52,497 కోట్లు ఖర్చు చేయాలని అంచనా వేశాం. రెండో విడతలో బహిరంగ మల విసర్జన రహితంతో (ఓడీఎఫ్‌) పాటు తడి, పొడి చెత్త నిర్వహణ కూడా ఉంటుంది. ఈ ఓడీఎఫ్‌ ప్లస్‌ కార్యక్రమం మహాత్మాగాంధీ జాతీయ ఉపాధి హామీ పథకంతో కలిసి.. జల్‌శక్తి మిషన్‌ పూర్తయ్యేందుకు పనిచేస్తుంది. ఈ కార్యక్రమం ప్రతిఒక్కరూ శౌచాలయం ఉపయోగించే దిశగా ముందుకు తీసుకెళ్తుంది’’ అని పేర్కొంది.

గ్రామీణ స్వచ్ఛ కార్యక్రమం 2014 అక్టోబర్‌ 2న ప్రారంభం కాగా.. ఇప్పటి వరకు దీని కింద మొత్తం 10కోట్ల శౌచాలయాలను నిర్మించారు. దీని ఫలితంగా 2019 అక్టోబర్‌ 2న అన్ని రాష్ట్రాల్లోని గ్రామీణ ప్రాంతాలు బహిరంగ మలవిసర్జన రహితమైనవి (ఓడీఎఫ్‌)గా ప్రకటించారు.