70 అడుగుల గోతిలో ఇరుక్కుపోయిన కార్మికుడు

ఎక్స్‌ప్రెస్‌ హైవే నిర్మాణపనుల్లో విషాదం

చండీగఢ్‌: దిల్లీ నుంచి జమ్మూలోని కటడా వరకు చేపట్టిన ఎక్స్‌ప్రెస్‌ హైవే నిర్మాణపనుల్లో భాగంగా తవ్విన భారీ గొయ్యి లోపల శనివారం సాయంత్రం నుంచి ఓ కార్మికుడు ఇరుక్కుపోయాడు. పంజాబ్‌లోని జలంధర్‌ జిల్లా కర్తార్‌పుర్‌ సమీపంలో ఈ ఘటన చోటుచేసుకొంది. భారీ పిల్లర్‌ ఏర్పాటు చేసేందుకని ఆ గొయ్యి తవ్వారు. లోపల బోరింగ్‌ యంత్రంలో సమస్య తలెత్తడంతో ఇద్దరు కార్మికులు అందులోకి దిగారు. పై నుంచి ఇసుక పడటం గమనించి పవన్‌ అనే కార్మికుడు పైకి చేరుకోగా.. సురేశ్‌ (55) మాత్రం 70 అడుగుల లోతులో చిక్కుకుపోయాడు. ఇతడు హరియాణాలోని జీంద్‌ ప్రాంతవాసి. ఎన్డీఆర్‌ఎఫ్‌, జిల్లా అధికారుల సహాయక చర్యలు ఆదివారం కూడా కొనసాగాయి.