Viral Video: పాముకు ప్రాణం పోసిన పోలీస్‌

అపస్మారక స్థితిలో ఉన్న పాముకు ఓ కానిస్టేబుల్‌ ఊపిరి ఊది ప్రాణాలు కాపాడారు. మధ్యప్రదేశ్‌లోని నర్మదాపురం జిల్లాలో సేమరి హరిచంద్‌ పోలీస్‌స్టేషన్‌ పరిధిలో ఈ ఘటన చోటుచేసుకుంది. ఇందుకు సంబంధించిన వీడియో ప్రస్తుతం సోషల్‌ మీడియాలో వైరల్‌ అవుతోంది. స్థానికంగా ఉన్న రెసిడెన్షియల్‌ కాలనీలో ఓ విషరహిత సర్పం పురుగుల మందు ప్రభావంతో అపస్మారక స్థితిలోకి వెళ్లింది. విషయం తెలియడంతో అక్కడకు చేరుకున్న హరిచంద్‌ పోలీస్‌స్టేషన్‌ కానిస్టేబుల్‌ అతుల్‌ శర్మ పాముపై నీళ్లు పోసి శుభ్రం చేశారు. అనంతరం సపర్యలు చేయడం మొదలుపెట్టారు. ఈ క్రమంలో చాలా సార్లు పాము అపస్మారక స్థితిలోకి వెళ్లింది. అయినా.. ఆపకుండా పాము నోట్లోకి గాలి ఊదారు. దాంతో కొద్దిసేపటికి ఆ సర్పం స్పృహలోకి వచ్చింది. అనంతరం దానిని తీసుకెళ్లి అటవీ ప్రాంతంలో విడిచిపెట్టారు. గత 15 సంవత్సరాల్లో తాను 500  పాములను రక్షించినట్లు ఈ సందర్భంగా అతుల్‌ శర్మ తెలిపారు.