ఘనంగా దర్శకుడు సుజీత్‌ వివాహం

హైదరాబాద్‌: యువదర్శకుడు సుజీత్‌ ఓ ఇంటివాడు అయ్యారు. తను ప్రేమించిన ప్రియురాలు ప్రవల్లికతో ఆయన వివాహం ఘనంగా జరిగింది. కుటుంబ సభ్యులు, అతి కొద్దిమంది బంధువులు మాత్రమే దీనికి హాజరయ్యారు. సుజీత్‌ వివాహానికి సంబంధించిన చిత్రాలు ప్రస్తుతం సామాజిక మాధ్యమాల వేదికగా చక్కర్లు కొడుతున్నాయి.

‘రన్‌ రాజా రన్‌’తో తెలుగు చిత్ర పరిశ్రమకు పరిచయమైన సుజీత్‌ తొలి చిత్రంతోనే మంచి విజయాన్ని అందుకున్నారు. తన రెండో చిత్రంగా ప్రభాస్‌తో ‘సాహో’ వంటి భారీ బడ్జెట్‌ చిత్రాన్ని తెరకెక్కించే అవకాశం దక్కించుకున్నారు. పాన్‌ ఇండియా సినిమా విడుదలైన ఈ చిత్రం బాక్సాఫీస్‌ వద్ద పర్వాలేదనిపించింది.

మలయాళంలో విజయవంతమైన ‘లూసిఫర్’ను చిరంజీవి కథానాయకుడిగా తెలుగులో రీమేక్‌ చేసే అవకాశం దక్కించుకున్నారు సుజీత్‌. ప్రస్తుతం దీనికి సంబంధించిన స్క్రిప్ట్‌ పనులు చూస్తున్నారు. చిరు-కొరటాల సినిమా పూర్తవగానే, ‘లూసిఫర్‌’రీమేక్‌ పట్టాలెక్కనుంది.