Omicron: సినీనటి శోభనకు ఒమిక్రాన్‌.. ఏయే లక్షణాలు ఉన్నాయంటే?

ముంబయి: సీనియర్‌ నటి, భరతనాట్య కళాకారిణి శోభన ఒమిక్రాన్‌ బారిన పడ్డారు. ఈ విషయాన్ని ఆమె స్వయంగా వెల్లడించారు. తనకు కీళ్ల నొప్పులు, చలిజ్వరం ఉన్నట్టు ఆమె తన ఇన్‌స్టా ఖాతాలో పేర్కొన్నారు. వ్యాక్సిన్లు వేసుకున్నా, ఎంత జాగ్రత్తగా ఉన్నా తనకు ఈ కొత్త వేరియంట్‌ సోకిందని తెలిపారు.  ‘జాగ్రత్తలు తీసుకున్నప్పటికీ ఒమిక్రాన్‌ బారిన పడ్డాను. ప్రస్తుతం కీళ్ల నొప్పులు, చలి జ్వరం, గొంతు నొప్పి ఉన్నాయి. తొలిరోజు ఈ లక్షణాలు ఉన్నప్పటికీ క్రమంగా తగ్గుతున్నాయి’ అంటూ ఇన్‌స్టాగ్రామ్‌లో వివరించారు. అయితే, తాను కరోనా వ్యాక్సిన్‌ రెండు డోసులు తీసుకున్నానని.. ఇప్పటికీ వ్యాక్సిన్‌ తీసుకోని వారు వెంటనే తీసుకోవాలని సూచించారు. అంతేకాకుండా ఈ వేరియంట్‌తోనే మహమ్మారి ముగింపు దశకు చేరుకోవాలని ప్రార్థిస్తున్నట్లు శోభన తెలిపారు. చెన్నైకి చెందిన 51ఏళ్ల శోభన మలయాళంతో పాటు తెలుగు, తమిళ భాషల్లోని అనేక చిత్రాల్లో నటించారు.