Vishnu Vishal: తండ్రి మాటలకు స్టేజ్‌పైనే భావోద్వేగానికి గురైన హీరో

చెన్నై: ‘అరణ్య’తో తెలుగు ప్రేక్షకులకు సుపరిచితులైన నటుడు విష్ణు విశాల్‌. హీరో కావాలనే ఆశతో ఇండస్ట్రీలోకి అడుగుపెట్టిన ఆయన అతి తక్కువ కాలంలోనే కోలీవుడ్‌లో స్టార్‌ స్టేటస్‌ సొంతం చేసుకున్నారు. ప్రస్తుతం ఆయన ప్రధాన పాత్రలో నటించిన కోలీవుడ్‌ చిత్రం ‘ఎఫ్‌ ఐ ఆర్‌’. తెలుగులోనూ ఈ చిత్రాన్ని విడుదల చేయనున్నారు. తాజాగా ఈసినిమా ప్రీ రిలీజ్‌ వేడుక చెన్నైలో జరిగింది. ఉగ్రవాదం, పోలీస్‌ వ్యవస్థ నేపథ్యంలో తెరకెక్కిన ఈ సినిమా ప్రీ రిలీజ్‌ వేడుకలో పోలీస్‌ అధికారి, విష్ణు విశాల్‌ తండ్రి రమేశ్‌ ముఖ్య అతిథిగా పాల్గొన్నారు.

ఇందులో భాగంగా, రమేశ్‌ మాట్లాడుతూ.. ‘‘మొదటిసారి ఓ సినిమా ఫంక్షన్‌లో ముఖ్య అతిథిగా పాల్గొనడం ఆనందంగా ఉంది. నా కొడుకు విష్ణుని చూస్తుంటే గర్వంగా ఉంది. తన వల్లే ఈ రోజు ఇక్కడ మీ అందరి ముందు నిలబడి మాట్లాడుతున్నాను. నా కొడుకు ఈ స్థాయిలో ఉండటానికి కారణమైన వారందరికీ నా కృతజ్ఞతలు. కెరీర్‌ ప్రారంభమైన నాటి నుంచి ఎంతోమంది వ్యక్తిగతంగా, కెరీర్‌పరంగా మా వాడికి సాయం చేశారు. ముఖ్యంగా అభిమానులు తనని ఎంతో ఆదరించారు. అందుకు ప్రతిఒక్కరికీ ధన్యవాదాలు. ఇటీవల నేను ‘ఎఫ్‌ ఐ ఆర్‌’ చూశాను. సినిమా బాగా వచ్చింది. తప్పకుండా మీ అందరికీ నచ్చుతుందని భావిస్తున్నా’’ అని చెప్పడంతో ఆయన మాటలు విని విష్ణు భావోద్వేగానికి గురయ్యారు. కన్నీరు పెట్టుకున్నారు.