ఇంటర్నెట్‌ డెస్క్‌: తమిళ నటుడు విష్ణు విశాల్‌ ప్రధాన పాత్రలో నటించిన చిత్రం ‘ఎఫ్‌ఐఆర్‌’. తీవ్రవాదం, ఉగ్రదాడి కుట్రలు నేపథ్యంలో తెరకెక్కిన ఈ చిత్రం శుక్రవారం ప్రేక్షకుల ముందుకు వచ్చింది. తాజాగా తెలంగాణలోని ఎంఐఎం పార్టీ ‘ఎఫ్‌ఐఆర్‌’ చిత్రంపై అభ్యంతరం వ్యక్తం చేసింది. ఈ మేరకు ఎంఐఎం ఎమ్మెల్యేలు సయ్యద్‌ అహ్మద్‌ పాషా, జఫర్‌ హుస్సేన్‌ మేరజ్‌, కౌసర్‌ మొహీదున్‌.. తెలంగాణ  సినిమాటోగ్రఫీ మంత్రి తలసాని శ్రీనివాస్‌ యాదవ్‌ని కలిశారు. ఈ చిత్ర పోస్టర్‌ బ్యాక్‌గ్రౌండ్‌లో ఉన్న ఓ పదం ముస్లింల మనోభావాలను కించపర్చేలా ఉందంటూ వారు అభ్యంతరం వ్యక్తం చేశారు. చిత్రంపై చర్యలు తీసుకోవాలంటూ తలసానికి వారు మెమోరాండం సమర్పించారు.

ప్రపంచవ్యాప్తంగా విడుదలైన ఈ చిత్రాన్ని ఇప్పటికే మూడు దేశాలు మాత్రం నిషేధించాయి. మలేషియా, కువైట్‌, ఖతర్‌తో ఈ సినిమా ప్రదర్శనకు అనుమతులు ఇవ్వలేదు. భారత్‌లో సెంట్రల్‌ బోర్డు ఆఫ్‌ ఫిల్మ్‌ సర్టిఫికేషన్‌ నుంచి యూ/ఏ సర్టిఫికేట్‌ పొందిన ఈ చిత్రం.. ఆ మూడు దేశాల్లోని స్థానిక సెన్సార్‌ బోర్డుల అనుమతి తీసుకోలేదట. అందుకే ‘ఎఫ్‌ఐఆర్‌’ను నిషేధించినట్లు తెలుస్తోంది.

ఉత్కంఠ రేపే సన్నివేశాలతో ఈ సినిమా మంచి టాక్‌ తెచ్చుకుంటోంది. కెమికల్‌ ఇంజినీరింగ్‌ చదువుకొని ఓ సంస్థలో పార్ట్‌ టైం ఉద్యోగం చేస్తున్న హీరోని పోలీసులు ఉగ్రవాదిగా భావించి అరెస్ట్‌ చేస్తారు. ఆ తర్వాత కొన్ని అనూహ్యమైన సంఘటనలు జరుగుతాయి. అవేంటి? అసలు హీరో ఉగ్రవాదా? అమాయకుడా? తెలియాలంటే సినిమా చూడాల్సిందే. హీరో విష్ణు విశాలే ఈ చిత్రాన్ని నిర్మించగా.. మను ఆనంద్‌ దర్శకత్వం వహించారు. ఇందులో హీరోయిన్‌గా మంజిమా మోహన్‌ నటించారు. గౌతమ్‌ వాసుదేవ్‌ మేనన్‌, రైజా విల్సన్‌, రెబా మోనికా తదితరులు కీలక పాత్రలు పోషించారు.