Anasuya: మగజాతి పరువు తీస్తున్నారంటూ నెటిజన్‌పై అనసూయ ఫైర్‌

హైదరాబాద్‌: డ్రెస్సింగ్ విషయంలో తరచూ పలువురు నెటిజన్ల నుంచి తీవ్ర విమర్శలు ఎదుర్కొంటున్నారు నటి అనసూయ. వ్యాఖ్యాతగా బుల్లితెర ప్రేక్షకుల్ని.. నటిగా వెండితెర ప్రియుల్ని అలరిస్తోన్న ఆమె తాజాగా ఓ నెటిజన్‌పై ఆగ్రహం వ్యక్తం చేశారు. మగజాతి పరువు తీస్తున్నారంటూ కీలక వ్యాఖ్యలు చేశారు. అసలేం జరిగిందంటే.. గతంలో పొట్టి గౌను ధరించి అనసూయ షేర్‌ చేసిన ఫొటోలపై సోమవారం ఉదయం ఓ నెటిజన్‌ స్పందించారు. ‘‘అనసూయ గారు.. మీరు ఇద్దరు పిల్లల తల్లి. ఇంకా ఇలాంటి పొట్టి పొట్టి దుస్తులు వేసుకుంటూ తెలుగు ఆడపడుచుల పరువు తీస్తున్నారు’’ అని అసహనం వ్యక్తం చేశాడు. దానిపై స్పందించిన అనసూయ.. ‘‘దయచేసి మీరు మీ పని చూసుకోండి. నన్ను నా పని చేసుకోనివ్వండి. మీరు ఇలా ఆలోచించి మగజాతి పరువు తీస్తున్నారు’’ అని కామెంట్‌ చేశారు.