Cash: అది రష్మిక సాంగ్‌ అంటూ సుమకు తమన్నా పంచ్‌

హైదరాబాద్‌: సుమ వ్యాఖ్యాతగా ఈటీవీలో ప్రసారమయ్యే ఎంటర్‌టైనింగ్‌ షో ‘క్యాష్‌: దొరికినంత దోచుకో’. తాజాగా ఈ షో 200 ఎపిసోడ్‌లను పూర్తి చేసుకుంది. ఈ సందర్భంగా స్పెషల్‌ ఎపిసోడ్‌కు ‘ఎఫ్‌3’ చిత్ర బృందం వచ్చి సందడి చేసింది. కథానాయికలు తమన్నా, సోనాల్‌ చౌహాన్‌, దర్శకుడు అనిల్‌ రావిపూడి, నటుడు సునీల్‌ ఈ ఎపిసోడ్‌లో పాల్గొన్నారు. ‘సరిలేరు నీకెవ్వరు’ సినిమాలో ‘మైండ్‌ బ్లాక్‌’పాటకు తమన్నా డ్యాన్స్‌ వేసిందంటూ సుమ చెప్పటం, ఆ పాటకు డ్యాన్స్‌ వేసింది తాను కాదని, రష్మిక అంటూ మిల్కీబ్యూటీ సమాధానం ఇవ్వటంతో సుమ కంగుతిన్నారు. చిన్న పిల్లలు తల్లిదండ్రులను చాకెట్లు కావాలని ఎలా అడుగుతారో తమన్నా, సునీల్‌ చేసి చూపించటం నవ్వులు పూయిస్తోంది. ఇక ఈ  కార్యక్రమంలో తమన్నా భావోద్వేగానికి గురయ్యారు. ఆమె ఎందుకు కన్నీరు పెట్టుకున్నారో తెలియాలంటే మే 14న ఎపిసోడ్‌ చూడాల్సిందే!