Colours Swathi: అలాంటి పాత్రలు చేయడానికి అంగీకరించలేదు..: కలర్స్‌ స్వాతి

హైదరాబాద్‌: బుల్లితెర ఆడియన్స్‌ను తన సరదా మాటలతో అలరించి ఆ తర్వాత వెండితెరపై మెరిసింది కలర్స్ స్వాతి. తెలుగులోనే కాకుండా దక్షిణాది భాషల్లో తనదైన నటనతో మెప్పించింది. త్వరలోనే ‘మంత్‌ ఆఫ్‌ మధు’ (Month Of Madhu)తో పలకరించనుంది. తాజాగా ఓ ఇంటర్వ్యూలో తన కెరీర్‌ తొలినాళ్లను గుర్తుచేసుకుంది.

‘‘కెరీర్‌ ప్రారంభంలో చాలా ఒడుదొడుకులు ఎదుర్కొన్నాను. ‘ఆడవారి మాటలకు అర్థాలే వేరులే’ లో వెంకటేష్‌ లాంటి అగ్ర హీరోకు మరదలిగా నటించాను. ఆ సినిమా సూపర్‌ హిట్‌ అయింది. ఆ తర్వాత ఎక్కువగా మరదలి పాత్రలే వచ్చాయి. సైడ్‌ క్యారెక్టర్లు చేయడం ఎందుకని తిరస్కరించాను. గ్రాఫ్‌ కొంచెం డల్‌గా అవుతుంది అనుకునే సమయానికి మంచి హిట్‌ వచ్చేది. ‘కార్తికేయ’, ‘స్వామిరారా’.. వంటి సినిమాల్లో నటించినందుకు చాలా ఆనందంగా ఉంది. ‘డేంజర్‌’ (Danger) సినిమా చేసినప్పుడు నాపై చాలా రూమర్స్‌ వచ్చాయి. కానీ వాటిని నేను అసలు పట్టించుకోలేదు. అవి రూమర్స్‌ అని తెలిసినప్పుడు వాటి గురించి ఆలోచించాల్సిన అవసరం లేదని నా అభిప్రాయం’’ అని చెప్పింది.

ఇక కలర్స్‌ స్వాతి హీరో నాని (Nani) సరసన నటించిన ‘అష్టా చమ్మా’లో (Ashta Chamma) అద్భుతమైన నటనకు ఎన్నో ప్రశంసలు అందుకుంది. అలాగే నంది అవార్డును కూడా సొంతం చేసుకున్న విషయం తెలిసిందే.