SIR: ధనుష్‌ చిత్రంపై ప్రముఖ దర్శకుడు భారతిరాజా ప్రశంసలు

చెన్నై: ధనుష్ (Dhanush)‌, సంయుక్త (Samyuktha) ప్రధాన పాత్రల్లో నటించిన సినిమా ‘సార్’ (SIR)‌. వెంకీ అట్లూరి (Venky Atluri) దర్శకత్వం వహించిన ఈ చిత్రం తాజాగా విడుదలై మంచి టాక్‌ను సొంతం చేసుకుంది. ధనుష్‌ సార్‌ పాత్రలో మెప్పించిన ఈ సినిమాపై ఇప్పటికే పలువురు సినీ ప్రముఖులు ప్రశంసలు కురిపించారు. తాజాగా ప్రముఖ దర్శకుడు భారతిరాజా (Bharathiraja) ఈ సినిమా చూసి చిత్రబృందాన్ని అభినందించారు.

విద్య ప్రాముఖ్యాన్ని ఈ సినిమాలో బాగా చూపించారని చెప్పిన భారతీరాజా ‘‘నా జీవితంలో ఎన్నో మైలురాళ్లను చూశాను. కొన్ని విషయాలు నన్ను ఆశ్చర్యపరిచాయి. సినిమాలు వినోదం పంచడంతో పాటు ప్రజలకు ఉపయోగపడేలా ఉండాలి. అలాంటి సినిమాల్లో ‘సార్‌’ ఒకటి. ప్రేక్షకులు ఈ సినిమాను ఆదరిస్తున్న తీరు బాగుంది. ఇటీవల కాలంలో వచ్చిన ఉత్తమ చిత్రాల్లో ఇదొకటి. ఈ సినిమాను థియేటర్లలో చూసి.. ఆ అనుభూతిని నాతో పంచుకోండి’’ అని కోరారు. ఇక ధనుష్‌ ఈ చిత్రంలో అద్భుతంగా నటించాడని పొడగ్తలు కురిపించారు. అలాగే టీచర్‌ పాత్రలో సంయుక్త చాలాబాగా చేసిందన్నారు. ఈ సినిమాకు సంగీతం ప్రత్యేక ఆకర్షణగా నిలిచిందని చెప్పారు. మంచి సంగీతాన్ని అందించినందుకు జీవీ ప్రకాష్‌ (GV Prakash)ను భారతిరాజా అభినందించారు.