FIR: ‘ఎఫ్‌ఐఆర్‌’లాంటి సినిమా చేయాలనుంది: రవితేజ

హైదరాబాద్‌: టాలీవుడ్‌ నటుడు రవితేజ వల్లే ‘ఎఫ్‌ఐఆర్‌’ (FIR) సినిమా తెలుగులో గ్రాండ్‌గా విడుదలవుతోందన్నారు తమిళ నటుడు విష్ణువిశాల్‌. ఆయన హీరోగా మను ఆనంద్‌ తెరకెక్కించిన చిత్రమిది. మంజిమా మోహన్‌ కథానాయిక. విష్ణువిశాల్‌ నిర్మించిన ఈ సినిమాని రవితేజ సమర్పిస్తున్నారు. ఈ చిత్రాన్ని ఫిబ్రవరి 11న ప్రేక్షకుల ముందుకు తీసుకొస్తున్న నేపథ్యంలో చిత్ర బృందం ‘ప్రీ రిలీజ్‌’ ప్రెస్‌మీట్‌ నిర్వహించింది.

ఈ సందర్భంగా విష్ణు విశాల్‌ మాట్లాడుతూ.. ‘‘మేం ముందు నుంచీ ఈ చిత్రాన్ని థియేటర్లలోనే విడుదల చేయాలని నిర్ణయించాం. ఓటీటీలో రిలీజ్‌ చేయాలనే ఆలోచన ఎప్పుడూ రాలేదు. అనుకున్నట్టుగానే థియేటర్లలోనే విడుదల చేయబోతున్నాం. తమిళంతోపాటు తెలుగులోనూ విడుదల చేస్తున్నందుకు చాలా ఆనందంగా ఉంది. ఈ సినిమా చూసి తప్పకుండా తెలుగులోకి డబ్‌ చేయమని జ్వాల పట్టుబట్టింది. ఎంతో ప్రోత్సహం అందించింది. ఈ సినిమాని సమర్పిస్తున్న రవితేజగారికి థ్యాంక్స్‌. ఆయన వల్లే ఈ చిత్రం ఇక్కడ గ్రాండ్‌గా విడుదలవుతోంది’’ అని తెలిపారు. ఈ కార్యక్రమంలో చిత్ర దర్శకుడు మను, రచయిత రాకేందు మౌళి, యువ నటులు సందీప్‌ కిషన్‌, సిద్ధు జొన్నలగడ్డ, మంజిమా మోహన్‌, బ్యాడ్మింటన్‌ క్రీడాకారిణి, విష్ణువిశాల్‌ సతీమణి గుత్తా జ్వాల తదితరులు పాల్గొన్నారు.

అప్పుడే ఫిక్స్‌ అయ్యా..

ఈ సినిమా గురించి రవితేజ, రామ్‌ పోతినేని పంచుకున్న విశేషాల వీడియోల్ని ఇదే వేదికపై ప్రదర్శించారు. ‘‘ఈ సినిమాను ఆరు నెలల క్రితమే చూశా. బాగా నచ్చటంతో ఈ చిత్రాన్ని సమర్పించాలని ఫిక్స్‌ అయ్యా. ఇలాంటి సినిమాలో నాకూ నటించాలనుంది. తెలుగులోనూ ఈ సినిమా విజయంవంతమై, విష్ణువిశాల్‌కి మంచి పేరు తీసుకురావాలని కోరుకుంటున్నా’’ అని ప్రముఖ నటుడు రవితేజ అన్నారు. రామ్‌ పోతినేని.. చిత్ర బృందానికి శుభాకాంక్షలు తెలిపారు.