మేలో హిందీ ‘ఛత్రపతి’

‘ఛత్రపతి’గా బాలీవుడ్‌ ప్రేక్షకుల్ని పలకరించనున్నారు కథానాయకుడు బెల్లంకొండ సాయి శ్రీనివాస్‌. ప్రభాస్‌-రాజమౌళిల హిట్‌ సినిమా ‘ఛత్రపతి’కి రీమేక్‌ ఇది. వి.వి.వినాయక్‌ తెరకెక్కించారు. పెన్‌ స్టూడియోస్‌ పతాకంపై ధవల్‌ జయంతిలాల్‌ గడా, అక్షయ్‌ జయంతిలాల్‌ గడా సంయుక్తంగా నిర్మించారు. ఈ సినిమా మే 12న థియేటర్లలోకి రానుంది. ఈ విషయాన్ని చిత్ర బృందం సోమవారం అధికారికంగా ప్రకటించింది. ఈ మేరకు విడుదల తేదీతో కూడిన కొత్త పోస్టర్‌ను పంచుకుంది. అందులో శ్రీనివాస్‌ కండలు తిరిగిన దేహంతో ఓ చేతిలో రాగి చెంబు పట్టుకొని, వీపుపై గాయాలతో యాక్షన్‌ మోడ్‌లో కనిపించారు. ఇది ఆయనకు, వినాయక్‌కు తొలి హిందీ చిత్రం. మాతృకకు కథ అందించిన విజయేంద్ర ప్రసాద్‌ ఈ రీమేక్‌ వెర్షన్‌కూ రచయితగా పని చేశారు. ప్రస్తుతం నిర్మాణాంతర పనులు శరవేగంగా జరుగుతున్నాయి. సంగీతం: తనిష్క్‌ బాగ్చి, ఛాయాగ్రహణం: నిజార్‌
అలీ షఫీ.