Prabhas-Nayanthara: శివ పార్వతులుగా నటిస్తున్నారా?

‘కన్నప్ప’ కోసం ప్రభాస్‌... నయనతార కలిసి కెమెరా ముందుకు రానున్నారా? ఈ ఇద్దరూ తెరపై శివ పార్వతుల పాత్రల్లో కనిపిస్తారా? చిత్రబృందం ఆ దిశగానే ప్రయత్నాలు చేస్తోంది. మంచు విష్ణు ప్రధాన పాత్రధారిగా ‘కన్నప్ప’ రూపొందుతున్న సంగతి తెలిసిందే. ఇటీవలే ఈ చిత్రం మొదలైంది. ఈ సినిమాలో ఓ కీలక పాత్రలో ప్రభాస్‌ నటించనున్నట్టు సమాచారం. ఇటీవల మరో కీలక పాత్ర కోసం చిత్రబృందం నయనతారని సంప్రదించింది. శివ పార్వతుల పాత్రలకోసమే ఆ ఇద్దరినీ సంప్రదించారని సమాచారం. శివ భక్తుడైన కన్నప్ప కథతో ఈ చిత్రం రూపొందుతోంది. భక్తి ప్రధానమైన ఈ సినిమాని పాన్‌ ఇండియా స్థాయిలో... అత్యున్నత ప్రమాణాలతో రూపొందిస్తున్నారు. ముఖేష్‌ కుమార్‌ సింగ్‌ దర్శకత్వం వహిస్తున్న ఈ సినిమాని మోహన్‌బాబుతో కలిసి మంచు విష్ణు నిర్మిస్తున్నారు.