సిధ్‌ శ్రీరామ్‌ ‘ఈ మాయ పేరేమిటో’ విన్నారా?

హైదరాబాద్‌: ప్రస్తుతం టాలీవుడ్‌లో యువ గాయకుడు సిధ్‌ శ్రీరామ్‌ హవా నడుస్తోంది. గతేడాది ఆయన పాట పాడిన సినిమాలన్నీ మంచి విజయాన్ని అందుకున్నాయి. అంతేకాదు, ఆ పాటలకు యూట్యూబ్‌లో మిలియన్ల కొద్దీ వ్యూస్‌ వచ్చాయి. ఇప్పుడు తాజాగా యువ కథానాయకుడు రాజ్‌తరుణ్‌ కోసం ఆయన గొంతు సవరించుకున్నారు. రాజ్‌ తరుణ్‌ హీరోగా విజయ్‌ కుమార్‌ కొండ దర్శకత్వంలో తెరకెక్కిన చిత్రం ‘ఒరేయ్‌ బుజ్జిగా’. మాళవిక, హెబ్బాపటేల్‌ కథానాయికలు. అన్ని కార్యక్రమాలు పూర్తి చేసుకున్న ఈ సినిమా ఉగాది కానుకగా మార్చి 25న ప్రేక్షకుల ముందుకు రానుంది. 

అనూప్‌ రూబెన్స్‌ స్వరాలు సమకూరుస్తున్న తాజా చిత్రం సిధ్‌ శ్రీరామ్‌ ఆలపించిన ‘ఈ మాయ పేరేమిటో’ అంటూ సాగే గీతాన్ని ఆలపించారు. అనూప్‌ అందించిన స్వరాలకు కిట్టు విస్సప్రగడ సాహిత్యం అందించారు. గురువారం ప్రముఖ దర్శకుడు సురేందర్‌రెడ్డి ఈ గీతాన్ని విడుదల చేసి, చిత్ర బృందానికి శుభాకాంక్షలు తెలిపారు. శ్రీ సత్య సాయి ఆర్ట్స్‌ పతాకంపై కె.కె.రాధామోహన్‌ ఈ సినిమా నిర్మిస్తున్నారు.