‘సరిలేరు..’ పాటతో అదరగొట్టిన దేవీశ్రీ మేనల్లుడు

హైదరాబాద్‌: గణతంత్ర దినోత్సవం సందర్భంగా ప్రముఖ సంగీత దర్శకుడు దేవిశ్రీ ప్రసాద్‌ తన అభిమానులకు ఒక మంచి గిఫ్ట్‌ ఇచ్చారు. ‘సరిలేరు నీకెవ్వరు’ చిత్రం టైటిల్‌ సాంగ్‌ను తన మేనల్లుడు తనవ్‌ సత్య పాడగా, ఆ వీడియోను అభిమానులతో పంచుకున్నారు. మొత్తం టైటిల్‌ సాంగ్‌ను మ్యూజిక్‌తో సహా ఆ చిన్నారి పాడటం నెటిజన్లను ఆకట్టుకుంటోంది. చాలా చక్కగా, ఓపికగా పాడాడంటూ ప్రశంసల జల్లు కురిపిస్తున్నారు.

‘‘మా మేనల్లుడు తనవ్‌ సత్య ‘సరిలేరు నీకెవ్వరు’ యాంథమ్‌ విత్‌ బ్యాగ్రౌండ్‌తో పాడిన పాట మీకోసం. తను ఎప్పుడు నేర్చుకున్నాడో నాకూ తెలియదు. పూర్తి పాటను ఎంతో ఓపికతో పాడాడు. మీకు ఆ ఓపిక ఉంటే దయచేసి చూడండి’’ అంటూ ట్వీట్‌ చేశారు.

మహేశ్‌బాబు కథానాయకుడిగా అనిల్‌రావిపూడి దర్శకత్వంలో తెరకెక్కిన చిత్రం ‘సరిలేరు నీకెవ్వరు’. రష్మిక కథానాయిక. సంక్రాంతి కానుకగా వచ్చిన ఈ చిత్రం బాక్సాఫీస్‌ వద్ద భారీ విజయాన్ని అందుకుంది. దేవిశ్రీ ప్రసాద్‌ ఈ చిత్రానికి సంగీతం అందించారు.