Disha: సినిమాను రెండు వారాలు ఆపండి

హైదరాబాద్‌: తెలుగు రాష్ట్రాల్లో సంచలనం సృష్టించిన దిశ హత్యాచారం కేసు, వాస్తవ సంఘటనల ఆధారంగా దర్శకుడు రాంగోపాల్‌వర్మ ‘దిశ’ పేరుతో ఓ చిత్రాన్ని తెరకెక్కించిన సంగతి తెలిసిందే. ఈ సినిమా విడుదల కాకుండా ఆపాలని దిశ కుటుంబ సభ్యులు హైకోర్టును ఆశ్రయించారు. సోమవారం ఈ అప్పీల్‌పై హైకోర్టులో విచారణ జరిగింది.

ఈ సినిమకు తామే దర్శక-నిర్మాతలమని ఆనంద్‌ చంద్ర, అనురాగ్‌లు న్యాయస్థానానికి వివరించారు. సినిమా టైటిల్‌ను ‘ఆశ ఎన్‌కౌంటర్‌’గా మార్చినట్లు తెలిపారు. సెన్సార్‌ బోర్డు కూడా సినిమాను వీక్షించి ఏ-సర్టిఫికెట్‌ ఇచ్చినట్లు వివరించారు. ఏవైనా అభ్యంతరాలు ఉంటే సెన్సార్‌ సర్టిఫికెట్‌ను సవాల్‌ చేసేందుకు వీలుగా వారం రోజులు సినిమా విడుదలను ఆపుతామని దర్శక-నిర్మాతలు కోర్టుకు విన్నవించారు. ఇరువురి వాదనలు విన్న కోర్టు సినిమా విడుదలను రెండు వారాలు ఆపాలని ఆదేశించింది. దిశ తండ్రి అప్పీలుపై విచారణను ముగిస్తున్నట్లు న్యాయమూర్తి తెలిపారు.