Major: అడివి శేష్‌ ‘మేజర్‌’.. ట్రైలర్‌ చూసిన రక్షణ మంత్రి రాజ్‌నాథ్‌ సింగ్‌

ఇంటర్నెట్‌ డెస్క్‌: అడివి శేష్‌ హీరోగా తెరకెక్కిన పాన్‌ ఇండియా చిత్రం ‘మేజర్‌’. 26/11 ముంబయి ఉగ్రదాడుల్లో వీరమరణం పొందిన మేజర్‌ సందీప్‌ ఉన్నికృష్ణన్‌ జీవితాధారంగా రూపొందిన ఈ సినిమా జూన్‌ 3న విడుదలకానుంది. ట్రైలర్‌ ఈ నెల 9న ప్రేక్షకుల ముందుకురానుంది. దేశభక్తి ప్రధానంగా సాగే కథ కావడంతో ట్రైలర్‌ను ముందుగానే రక్షణ శాఖ మంత్రి రాజ్‌నాథ్‌ సింగ్‌కు చిత్ర బృందం చూపించింది. ట్రైలర్‌ను మెచ్చిన ఆయన చిత్రం మంచి విజయం అందుకోవాలని ఆకాంక్షించారు. ‘మేజర్‌’ స్లోగన్‌ను విడుదల చేశారు. సంబంధిత వీడియోను సోషల్‌ మీడియా అభిమానులతో పంచుకుంటూ శేష్‌ తన సంతోషాన్ని వ్యక్తం చేశాడు. శశి కిరణ్‌ తిక్కా దర్శకత్వం వహించిన ఈ సినిమాలో శోభిత ధూళిపాళ, సయీ మంజ్రేకర్‌, ప్రకాష్‌ రాజ్‌, రేవతి, మురళి శర్మ తదితరులు కీలక పాత్రలు పోషించారు. జీఎంబీ ఎంటర్‌టైన్‌మెంట్‌, ఏ ప్లస్‌ ఎస్‌ మూవీస్‌, సోనీ పిక్చర్స్‌ ఫిల్మ్స్‌ సంస్థలు సంయుక్తంగా నిర్మించాయి.