‘ఇస్మార్ట్ శంక‌ర్‌’కి 200 మిలియన్ల వీక్షణలు

ఇంట‌ర్నెట్ డెస్క్‌: రామ్ హీరోగా పూరి జ‌గ‌న్నాథ్ తెర‌కెక్కించిన చిత్రం ‘ఇస్మార్ట్ శంక‌ర్‌’. 2019లో బాక్సాఫీసు వ‌ద్ద ఘ‌న విజ‌యం అందుకున్న ఈ చిత్రం తాజాగా స‌రికొత్త రికార్డు నెల‌కొల్పింది. విశేష ప్రేక్ష‌కాద‌ర‌ణ పొందిన తెలుగు చిత్రాలు హిందీలో డబ్ అయ్యే విష‌యం తెలిసిందే. ఈ క్ర‌మంలోనే యూ ట్యూబ్‌లో అప్‌లోడ్ అయిన ఇస్మార్ట్ శంక‌ర్.. అత్య‌ధిక వీక్ష‌ణ‌లు సొంతం చేసుకుని సంచ‌ల‌నం సృష్టించింది. 200 మిలియ‌న్ (20 కోట్లు) మందికి పైగా ఈ చిత్రాన్ని వీక్షించారు. త‌క్కువ స‌మ‌యంలోనే ఇంత‌మంది చూడ‌టం విశేషం. యాక్ష‌న్ నేప‌థ్యంలో రూపొందిన ఈ సినిమాలో రామ్ త‌న‌లోని మాస్ కోణాన్ని ఆవిష్క‌రించారు. టైటిల్ పాత్ర పోషించి మంచి క్రేజ్ సంపాదించారు. రామ్ స‌ర‌స‌న నిధి అగ‌ర్వాల్‌, న‌భా న‌టేశ్ న‌టించారు. మ‌ణిశ‌ర్మ సంగీతం అందించారు. పూరి జ‌గ‌న్నాథ్‌, ఛార్మి నిర్మాత‌లు.