Pooja Hegde: నెరవేరిన కల

కథానాయికగా కెరీర్‌ ఆరంభంలోనే వైవిధ్యభరిత కథల్లో నటించే  అవకాశాలు అందుకొంది పూజా హెగ్డే. అయితే ఇప్పటి వరకు ఎన్ని చిత్రాలు చేసినా.. ప్రభాస్‌తో కలిసి చేసిన ‘రాధేశ్యామ్‌’ తనకెంతో ప్రత్యేకమని చెబుతోంది ఈ బుట్టబొమ్మ. సంక్రాంతి సందర్భంగా జనవరి 14న విడుదల కావాల్సిన ఈ పాన్‌ ఇండియా చిత్రం.. కరోనా పరిస్థితుల వల్ల వాయిదా పడిన సంగతి తెలిసిందే. ఈ  నేపథ్యంలోనే ఓ జాతీయ మీడియాకిచ్చిన ఇంటర్వ్యూలో ‘రాధేశ్యామ్‌’కి సంబంధించి ఆసక్తికర విషయాలు పంచుకుంది పూజా.  ‘‘ఓ వైవిధ్యభరిత ప్రేమ కథా చిత్రంలో నటించాలని నేనెప్పటి నుంచో కలలు కంటున్నా. ‘రాధేశ్యామ్‌’తో నా కల నెరవేరింది. నేనిప్పటి వరకు చేసిన చిత్రాల్లో నాకెంతో క్లిష్టమైనది.. ప్రత్యేకమైనది ఈ సినిమానే. దీంట్లో నాయిక పాత్ర అద్భుతంగా ఉంటుంది. ఇదొక పీరియాడికల్‌ ప్రేమకథా చిత్రం కావడంతో.. ప్రేరణ పాత్ర కోసం ఎంతో రీసెర్చ్‌ చేయాల్సి వచ్చింది. ఏదేమైనా ఈ ప్రయాణం నాకెంతో ప్రత్యేకమైనది’’ అని చెప్పుకొచ్చింది పూజా హెగ్డే. ఈ లవ్‌ మేజిక్‌ను వెండితెరపై చూసేందుకు అందరిలాగే తానూ ఆతృతగా ఎదురు చూస్తున్నట్లు తెలిపింది.