Rahat Fateh Ali Khan: శిష్యుణ్ని చెప్పుతో కొట్టిన ప్రముఖ సింగర్‌.. తర్వాత వివరణ!

ఇస్లామాబాద్‌: పాకిస్థాన్‌కు చెందిన ప్రముఖ గాయకుడు రాహత్‌ ఫతేహ్‌ అలీ ఖాన్ (Rahat Fateh Ali Khan) తన శిష్యుణ్ని చెప్పుతో కొడుతున్న వీడియో సామాజిక మాధ్యమాల్లో వైరల్‌గా మారింది. దాంట్లో ఉన్నది తానేనని ఫతేహ్‌ అలీ ఖాన్ ధ్రువీకరించారు. బాధితుడికి క్షమాపణలు చెప్పారు. ఒక బాటిల్ కనిపించకుండా పోయిన విషయంలో అతడిపై చేయి చేసుకున్నట్లు తెలుస్తోంది. తనని వదిలేయాలంటూ బాధితుడు ప్రాధేయపడుతుండటం ఆ వీడియోలో గమనించొచ్చు. సహనం కోల్పోయిన అలీ ఖాన్‌ను ఇతర సిబ్బంది నిలువరించారు. 

దీనికి సంబంధించిన దృశ్యాలు వైరల్‌ కావడంతో వివరణ ఇస్తూ అలీ ఖాన్‌ (Rahat Fateh Ali Khan) మరో వీడియో విడుదల చేశారు. ఇది గురు, శిష్యుల మధ్య విషయమని వ్యాఖ్యానించారు. బాధితుడు తన సొంత శిష్యుడేనని.. కుమారుడిలాంటి వాడని చెప్పుకొచ్చారు. శిష్యుడు తప్పు చేస్తే గురువు దండించినట్లుగానే దీన్ని భావించాలన్నారు. ఒకవేళ అతడు మంచి చేస్తే ప్రేమ కురిపిస్తానని.. తప్పు చేస్తే శిక్షిస్తానని అన్నారు. బాధితుడికి తర్వాత క్షమాపణలు చెప్పినట్లు వెల్లడించారు.

యువతారలదే ఈ వేసవి

ఈ ఘటనపై వివరణ ఇచ్చిన వీడియోలో బాధితుడు కూడా మాట్లాడారు. పవిత్ర జలానికి సంబంధించిన ఓ బాటిల్ కనిపించకుండా పోవడానికి తానే కారణమని.. అందుకే ఫతేహ్‌ అలీ ఖాన్‌ దండించారని తెలిపారు. అంతకుమించి దీంట్లో ఎలాంటి దురుద్దేశం లేదన్నారు. అలీ ఖాన్‌ తనకు తండ్రిలాంటి వారని.. తమని చాలా ప్రేమిస్తారని చెప్పారు. తమ గురువు పరువుకు భంగం కలిగించాలనే ఉద్దేశంతోనే ఎవరో ఈ వీడియోను వైరల్‌ చేశారని చెప్పారు.