Rashmika: మిమ్మల్ని చూస్తుంటే చాలా గర్వంగా ఉంది : రష్మిక

హైదరాబాద్‌: ‘కలర్‌ఫొటో’ సినిమాతో మంచి గుర్తింపు తెచ్చుకున్న సుహాస్ ‌(Suhas)..  ‘రైట‌ర్ ప‌ద్మభూష‌ణ్‌’ (Writer Padmabhushan)తో  మరోసారి ప్రేక్షకులను ఆకట్టుకున్నాడు. చిన్న సినిమాగా విడుదలై భారీ విజయాన్ని సొంతం చేసుకుంది. సందేశాత్మక చిత్రంగా రూపొందిన ఈ చిత్రం ఫ్యామిలీ ఆడియన్స్‌ను ఆకర్షిస్తోంది. ఇప్పటికే ఈ సినిమాపై సినీప్రముఖులు ప్రశంసలు కురింపించిన విషయం తెలిసిందే. తాజాగా ఈ లిస్ట్‌లో నేషనల్‌ క్రష్ రష్మిక, మాస్‌ మహారాజ్‌ రవితేజ చేరారు.

తాజాగా ఈ సినిమా చూసిన రష్మిక (rashmika) తనకు సినిమా ఎంతో నచ్చిందని తెలిపింది. అందమైన చిత్రాన్ని తీశారంటూ పొడగ్తల వర్షం కురిపించింది. ‘‘మిమ్మల్ని చూస్తుంటే చాలా గర్వంగా ఉంది. ఇంత భారీ విజయాన్ని సాధించినందుకు మీ అందరికీ అభినందనలు. అందరూ చూడాల్సిన సినిమా ఇది. ముఖ్యంగా మహిళలు ఈ సినిమాను కచ్చితంగా చూడాలి’’ అని రష్మిక తెలిపింది. ఇక రవితేజ (Raviteja) కూడా ఈ చిత్రాన్ని కొనియాడారు. సుహాస్‌ నటన అద్భుతంగా ఉందని.. సినిమా చూసినంతసేపు ఎంజాయ్‌ చేశానన్నారు. క్లైమాక్స్‌ హృదయానికి హత్తుకునేలా ఉందన్నారు. అందరూ ఈ సినిమా చూడాలని ఆయన కోరారు. హీరో నవీన్‌ పోలిశెట్టి(Naveen Polishetty) కూడా ఈ సినిమాపై తన రివ్యూ తెలియజేశాడు. ‘రైట‌ర్ ప‌ద్మభూష‌ణ్‌’ సినిమాకు వచ్చిన స్పందన చూస్తుంటే చాలా ఆనందంగా ఉందన్నారు. కుటుంబసభ్యులతో కలిసి చూసే సినిమా అని అన్నారు.