RGV: ఆర్జీవీ లైవ్‌ డ్యాన్స్‌ పెర్ఫార్మెన్స్‌.. వీడియో వైరల్‌

హైదరాబాద్‌: ప్రముఖ దర్శకుడు రామ్‌గోపాల్‌ వర్మ తనలోని కొత్త టాలెంట్‌ను మరోసారి బయటపెట్టారు. లైవ్‌లో అందరి ముందు డ్యాన్స్‌ చేసి మెప్పించారు. బయోపిక్‌లు తీయడంలో తన మార్క్‌ను చూపించే ఆర్జీవీ దర్శకత్వం వహించిన కొత్త చిత్రం ‘కొండా’. కొండా మురళి - సురేఖ దంపతుల జీవితకథతో దీనిని రూపొందించారు. త్రిగుణ్‌, ఇర్రా మోర్‌ ప్రధాన పాత్రల్లో నటించారు. జూన్‌ 23న ఈ సినిమా థియేటర్లలో విడుదల కానుంది. ఈనేపథ్యంలోనే  ఈ సినిమా ప్రీ రిలీజ్‌ వేడుక శనివారం సాయంత్రం హన్మకొండలో జరిగింది. ఈ ఈవెంట్‌లో చిత్రబృందంతోపాటు కొండా దంపతులు సందడి చేశారు. కాగా, ఈవెంట్‌లో పాల్గొన్న వారికి ఆర్జీవీ స్పెషల్‌ ట్రీట్ ఇచ్చారు. ఈ సినిమాలోని ఓ పాటకు లైవ్‌లో ఆయన డ్యాన్స్‌ చేశారు. ఓ ఈవెంట్‌లో ఇలా డ్యాన్స్‌ చేయడం ఇదే మొదటిసారి. ప్రస్తుతం ఈ వీడియో నెట్టింట వైరల్‌గా మారింది. ‘‘వర్మ సారూ.. ఏం చేసినా వైరల్‌ కావాల్సిందే’’ అని పలువురు కామెంట్లు చేస్తున్నారు. ఇక, గతంలోనూ ‘బ్యూటీఫుల్‌’ ప్రెస్‌మీట్‌లో వర్మ డ్యాన్స్ చేసి అలరించారు.