Rishab Shetty: ఆఫీస్‌ బాయ్‌గా పనిచేసిన సిటీలోనే అవార్డు అందుకున్న రిషబ్‌శెట్టి

ముంబయి: ‘కాంతార’ (Kantara)తో దేశవ్యాప్తంగా క్రేజ్‌ అందుకున్నారు నటుడు రిషబ్‌శెట్టి (Rishab Shetty). భూతకోల నేపథ్యంలో తెరకెక్కిన ఈ చిత్రానికి గానూ ఉత్తమ నటుడిగా క్రిటిక్స్‌ ఛాయిస్‌ అవార్డును సొంతం చేసుకున్నారు. ముంబయి వేదికగా శుక్రవారం సాయంత్రం జరిగిన ఈ అవార్డుల కార్యక్రమంలో రిషబ్‌ మాట్లాడుతూ.. ‘‘ఈ అవార్డుకు నన్ను ఎంపిక చేసినందుకు ధన్యవాదాలు. 15 ఏళ్ల క్రితం నేను మొదటిసారి ముంబయికి వచ్చాను. అంధేరీ వెస్ట్‌లో ఉన్న ఓ నిర్మాణ సంస్థలో ఆఫీస్‌ బాయ్‌గా పనిచేశా. 15 ఏళ్ల తర్వాత ఇప్పుడు ఇదే ముంబయిలో ఉత్తమ నటుడిగా అవార్డు అందుకున్నా. ఈ క్షణం చాలా సంతోషంగా ఉంది’’ అని అన్నారు.

ఉత్తమ నటిగా సాయిపల్లవి..!

ఇదే కార్యక్రమంలో ఉత్తమ నటిగా సాయిపల్లవి (Sai Pallavi) అవార్డు దక్కించుకున్నారు. ‘గార్గి’కి గానూ ఆమె ఈ అవార్డును అందుకున్నారు. ‘‘ఈ అవార్డును అందుకోవడం చాలా సంతోషంగా ఉంది. ఒక సినిమా కోసం ప్రతి ఒక్కరూ ఎంతో కష్టపడి వర్క్‌ చేస్తుంటారు. ప్రేక్షకుల ప్రేమాభిమానాలు పొందుతున్నందుకు ఆనందిస్తున్నా. నేను ఇలాంటి మరిన్ని ప్రాజెక్ట్‌లు చేయడానికి ఈ అవార్డులు ఎంతగానో దోహదపడతాయి’’ అని సాయిపల్లవి అన్నారు.

కాంతార అప్‌డేట్‌ ఇదే..!

భూతకోల నేపథ్యంలో తెరకెక్కిన చిత్రం ‘కాంతార’ (Kantara). రిషబ్‌ శెట్టి స్వీయ దర్శకత్వంలో ఇది రూపుదిద్దుకుంది. సాధారణ సినిమాగా విడుదలైన ఇది అసాధారణ విజయాన్ని అందుకుంది. ప్రస్తుతం ఈ చిత్రానికి ప్రీక్వెల్‌ రానున్న విషయం తెలిసిందే. ఇదే విషయాన్ని రిషబ్‌ మరోసారి స్పష్టం చేశారు. సీసీఏ అవార్డు తీసుకున్న అనంతరం ఆయన ఈ ప్రాజెక్ట్‌ గురించి మాట్లాడుతూ.. ‘‘మీరు ఇప్పటికే ‘కాంతార -2’ చూశారు. త్వరలో ‘కాంతార-1’ చూడనున్నారు’’ అని చెప్పారు.