Kiara-Sidharth: వధువుగా మెరిసిన కియారా.. మురిసిపోయిన సిద్ధార్థ్‌.. వెడ్డింగ్‌ వీడియో వైరల్‌

ముంబయి: బాలీవుడ్‌ నటులు కియారా అడ్వాణీ (Kiara Advani), సిద్ధార్థ్‌ మల్హోత్ర (Sidharth Malhotra) మూడుముళ్ల బంధంతో ఒక్కటైన విషయం తెలిసిందే. రాజస్థాన్‌లోని జైసల్మేర్‌ సూర్యఘడ్‌ ప్యాలెస్‌లో వీరి వివాహం కన్నుల పండువగా జరిగింది. కుటుంబసభ్యులు, బంధుమిత్రుల సమక్షంలో ఒక్కటైన ఈ జంట వారి పెళ్లి వీడియోను అభిమానులతో పంచుకున్నారు. ఆనందంతో డాన్స్‌ వేస్తూ కియారా పెళ్లి వేదికపైకి రాగా.. తనను చూసిన సిద్ధార్థ్‌ సంతోషంతో ఆమెను తన జీవితంలోకి ఆహ్వానించాడు. వారి ఆనందక్షణాల వీడియో ఇప్పుడు నెట్టింట సందడి చేస్తోంది. వీడియో (Kiara wedding video) చూసిన అభిమానులు నూతన దంపతులకు శుభాకాంక్షలు చెబుతున్నారు. ‘చూడ ముచ్చటైన జంట’ అంటూ కామెంట్స్‌ చేస్తున్నారు. ఫ్యాన్స్‌తోపాటు సినీ, క్రీడా ప్రముఖులు సోషల్‌ మీడియా వేదికగా ఆశీస్సులు తెలుపుతున్నారు.

‘షేర్షా’ (Shershaah) సినిమాతో వెండితెరపై ఈ జంట సూపర్‌జోడిగా పేరు తెచ్చుకుంది. ఆ సినిమా పూర్తయిన కొద్దిరోజులకే  వీరి మధ్య ప్రేమ చిగురించింది. ఆ తర్వాత పలు ఈవెంట్స్‌ల్లో వీరిద్దరూ కలిసి కనిపించడం, కలిసి విహారయాత్రలకు వెళ్లిన ఫొటోలు పలుమార్లు చక్కర్లు కొట్టిన విషయం తెలిసిందే.