Suriya: ‘రోలెక్స్’ రాకపై సూర్య కామెంట్స్ వైరల్‌

హైదరాబాద్‌: ‘రోలెక్స్‌’ (Rolex).. కమల్‌హాసన్‌ (Kamal Haasan) ప్రధాన పాత్రలో నటించిన ‘విక్రమ్‌’ (Vikram) సినిమా చూసినవాళ్లకు ఈ పాత్ర ఎప్పటికీ గుర్తుండిపోతుంది. డ్రగ్స్‌ దందాను నడిపే నాయకుడిగా, నెగెటివ్‌ షేడ్స్‌ ఉన్న పాత్రలో ఆయన అదరగొట్టేశారు. ఈ పాత్రలో నటించడంపై తాజాగా సూర్య (Suriya) స్పందించారు. ఇటీవల జరిగిన ఫిలింఫేర్‌ అవార్డుల ప్రదానోత్సవంలో దీని గురించి మాట్లాడారు.

కేవలం ఆయన కోసమే..

‘‘కమల్‌హాసనే నా స్ఫూర్తి. ఈరోజు నేను ఈ స్థితిలో ఉండటానికి ఆయన ఓ కారణం. ‘విక్రమ్‌’ సినిమాలో ఆఫర్‌ ఉందని దర్శకుడు లోకేశ్‌ ఫోన్‌ చేశాడు. ఆ సినిమాలో నటించే అవకాశాన్ని వదులుకోకూడదనుకున్నా. నా ఆనందాన్ని అందరితో పంచుకోవాలనుకున్నా. అయితే రోలెక్స్‌ పాత్ర గురించి విన్నాక.. అలాంటి పాత్రలో నటిస్తే ఏమనుకుంటారోననే సందేహం వచ్చింది. వెంటనే చేయనని చెప్పేశా. కానీ, చివరకి, కమల్‌హాసన్‌ కోసమే ఈ పాత్ర పోషించా’’ అని సూర్య వివరించారు. అనంతరం, ‘రోలెక్స్‌ రోల్‌లో మళ్లీ కనిపిస్తారా?’ అని అడగ్గా.. ‘‘కాలమే సమాధానం చెబుతుంది. సమయం వచ్చినప్పుడు తప్పకుండా చేస్తా’’ అని బదులిచ్చారు.