War2: రా ఏజెంట్‌గా ఎన్టీఆర్‌?

‘వార్‌ 2’ కోసం ఎన్టీఆర్‌ రంగంలోకి దిగే సమయం వచ్చింది. వచ్చే నెలలోనే ఆయన ఈ సినిమా సెట్లోకి అడుగు పెట్టే అవకాశాలున్నాయని బాలీవుడ్‌ వర్గాలు చెబుతున్నాయి. యశ్‌రాజ్‌ స్పై యూనివర్స్‌లో భాగంగా రూపొందుతున్న చిత్రమే ‘వార్‌ 2’. అయాన్‌ ముఖర్జీ దర్శకత్వం వహిస్తున్నారు.  బాలీవుడ్‌ కథానాయకుడు హృతిక్‌రోషన్‌, ఎన్టీఆర్‌ ప్రధాన పాత్రధారులుగా నటిస్తున్నారు. ఈ వారంలో చిత్రీకరణని ప్రారంభించనున్నారు. హృతిక్‌ రోషన్‌పై కీలక సన్నివేశాల్ని జపాన్‌లో తెరకెక్కిస్తారని సమాచారం. ఆ తర్వాత షెడ్యూల్‌లో ఎన్టీఆర్‌ రంగంలోకి దిగే అవకాశాలున్నట్టు తెలుస్తోంది.  ఇందులో ఎన్టీఆర్‌ పోషించనున్న పాత్రపై పలు ఆసక్తికరమైన విషయాలు వినిపిస్తున్నాయి. ఇండియన్‌ రా ఏజెంట్‌ పాత్రలో ఆయన కనిపిస్తారని, ఆ పాత్ర భవిష్యత్తులో తరచూ తెరపై కనిపిస్తూనే ఉంటుందని, ఆ నేపథ్యంలో సోలోగా ఓ సినిమా కూడా రూపొందనుందని బాలీవుడ్‌ వర్గాలు చెబుతున్నాయి. ప్రస్తుతం ‘దేవర’ చిత్రీకరణలో పాల్గొంటున్నారు ఎన్టీఆర్‌.