ఇమ్మిగ్రేషన్‌ అధికారులకు బాడీ కెమెరాలు

వాషింగ్టన్‌: అమెరికాలోని హోంల్యాండ్‌ సెక్యూరిటీకి చెందిన ఇమ్మిగ్రేషన్‌ అండ్‌ కస్టమ్స్‌ ఎన్‌ఫోర్స్‌మెంట్‌ (ఐసీఈ) అధికారులు ఇకపై బాడీ కెమెరాలు ధరించనున్నారు. నేర విచారణతో పాటు ఐసీఈ ఏజెంట్ల కార్యకలాపాలను పర్యవేక్షించేందుకు ఈ కెమెరాలు దోహదం చేయనున్నాయి. పైలట్‌ ప్రాజెక్టుగా న్యూయార్క్‌ సిటీ, నెవార్క్‌, న్యూజెర్సీ, హ్యూస్టన్‌, టెక్సాస్‌ నగరాల్లోని కొందరు ఏజెంట్లకు ఈ బాడీ కెమెరాలు అమర్చనున్నట్లు హోంల్యాండ్‌ సెక్యూరిటీకి చెందిన సీనియర్‌ అధికారి ఒకరు వెల్లడించారు.

అమెరికాకు వలస వచ్చే వారి పట్ల ఐసీఈ ఏజెంట్లు అక్రమంగా అరెస్టులు చేస్తుంటారన్న ఆరోపణలు ఉన్నాయి. ఈ నేపథ్యంలో పారదర్శకత, జవాబుదారీతనం కోసం బాడీ కెమెరాల ఏర్పాటు నిర్ణయం తీసుకున్నట్లు ఐసీఈ ఓ ప్రకటనలో తెలపడం గమనార్హం. అరెస్టులు, అనుమానితులను విచారించడం, సెర్చ్‌వారెంట్ల సమయంలో బాడీ కెమెరాలను ఏజెంట్లు వినియోగించనున్నారు. ఆరు నెలల పాటు ఈ పైలట్‌ ప్రాజెక్ట్‌ చేపట్టనున్నారు. సాంకేతికత వినియోగం వల్ల లాభనష్టాలను బేరీజు వేసుకుని పూర్తి స్థాయిలో వినియోగానికి శ్రీకారం చుట్టనున్నారు. అమెరికాలో డ్రగ్స్‌, మానవ అక్రమ రవాణా వంటి నేరాలను అరికట్టడానికి ఐసీఈ పనిచేస్తుంటుంది.