కివీస్‌ స్కోరు 401.. వర్షంతో ఆగిన మ్యాచ్‌.. DLS ప్రకారం పాక్‌కే విజయావకాశాలు!

బెంగళూరు: ప్రపంచకప్‌లో న్యూజిలాండ్, పాకిస్థాన్ (NZ vs PAK) మధ్య రసవత్తరంగా సాగుతోన్న మ్యాచ్‌కు వరుణుడు అంతరాయం కలిగిస్తున్నాడు. తొలుత బ్యాటింగ్ చేసిన కివీస్‌ నిర్ణీత 50 ఓవర్లలో 6 వికెట్ల నష్టానికి 401 పరుగుల భారీ స్కోరు సాధించింది. ఈ కొండంత లక్ష్యఛేదనలో పాకిస్థాన్ దీటుగా ప్రతిఘటిస్తోంది. వర్షం వల్ల ఆట నిలిచిపోయేసరికి 21.3 ఓవర్లలో ఒక వికెట్ నష్టానికి 160 పరుగులు చేసింది. ఓపెనర్ ఫకార్ జమాన్‌ (106*; 69 బంతుల్లో 7 ఫోర్లు, 9 సిక్స్‌లు) దూకుడగా ఆడుతూ శతకం పూర్తి చేసుకున్నాడు. బాబర్ అజామ్ (47*; 51 బంతుల్లో 4 ఫోర్లు, 1 సిక్స్‌) అర్ధ శతకానికి చేరువలో ఉన్నాడు. డక్‌వర్త్‌లూయిస్ పద్ధతి ప్రకారం.. పాక్‌ విజయానికి 21.3 ఓవర్లలో 150 పరుగులు అవసరం. ఇప్పటికే పాకిస్థాన్‌ 160/1 స్కోరు కొనసాగుతోంది. దీంతో 10 పరుగుల ముందంజలోనే ఉండటం గమనార్హం. పాక్‌కు ఈ మ్యాచ్‌ చాలా కీలకం. ఇందులో విజయం సాధిస్తేనే ఆ జట్టు సెమీస్ ఆశలు సజీవంగా ఉంటాయి.