వీడియో కాల్‌ చేస్తున్నా సంగీతం వినొచ్చు

ఎప్పటికప్పుడు కొత్త ఫీచర్లతో అలరించే వాట్సప్‌ మరో వినూత్న సదుపాయాన్ని తీసుకొస్తోంది. ఇది వీడియో కాల్‌ చేస్తున్నప్పుడు ఎవరైనా స్క్రీన్‌ షేర్‌ చేస్తే పాటల వంటివి వినటానికీ వీలు కల్పిస్తుంది. ఐఓఎస్‌, ఆండ్రాయిడ్‌ రెండు పరికరాల కోసమూ దీన్ని రూపొందిస్తున్నారు. దేని గురించైనా చర్చిస్తున్నప్పుడు వినోదం కోసం సంగీతం వినటం వంటి మల్టీమీడియా సదుపాయాల విషయంలో ఇది కొత్త దారులు తెరవగలదని భావిస్తున్నారు. కేవలం మాట్లాడుకోవటానికే కాకుండా వినోద భరిత అంశాలకూ వాట్సప్‌ను వాడుకోవటం ఇటీవల ఎక్కువైంది. ఈ నేపథ్యంలో కొత్త ఫీచర్‌ వాట్సప్‌ను మరింత ఆకర్షణీయంగా మార్చగలదని భావిస్తున్నారు. మరోవైపు.. ‘మేనేజ్‌ ఎమోజీ రిప్లేస్‌మెంట్‌’ అనే ఫీచర్‌నూ బీటా టెస్టర్లకు వాట్సప్‌ అందుబాటులోకి తెచ్చింది. టెక్స్ట్‌ టు ఎమోజీ రిప్లేస్‌మెంట్‌ ఆప్షన్‌ను డిసేబుల్‌ చేసుకోవటానికిది తోడ్పడుతుంది. మెసేజ్‌ల విషయంలో యూజర్లకు ఎక్కువ నియంత్రణ కలిగుండటానికిది ఉపయోగపడుతుంది.