రామప్ప ఆలయంలో సోమసూత్రం సమస్యకు పరిష్కారం

వెంకటాపూర్‌, న్యూస్‌టుడే: ములుగు జిల్లా వెంకటాపూర్‌ మండలంలోని రామప్ప ఆలయంలో సోమసూత్రం (శివలింగ అభిషేక జలం బయటకు వెళ్లే మార్గం) సమస్య పరిష్కారమైంది. ఇటీవల మహాశివరాత్రి సందర్భంగా రామప్పకు వచ్చిన కేంద్ర మంత్రి కిషన్‌రెడ్డి.. ఈ సమస్యను నేరుగా చూసి పరిష్కరించాలని పురావస్తు శాఖ, జిల్లా యంత్రాంగాన్ని ఆదేశించడంతో ఈ మేరకు చర్యలు చేపట్టారు.

గర్భగుడిలోని మహాశివుడి అభిషేక జలం సాఫీగా బయటకెళ్లేలా నిర్మాణ సమయంలో రాతితో సోమసూత్రం ఏర్పాటు చేశారు. దశాబ్దాల కిందట వచ్చిన భూకంపం సమయంలో ఆలయంలోని కొన్ని స్తంభాలు, శివలింగం, సోమసూత్రం కుంగిపోయాయి. 2000 సంవత్సరంలో శివలింగాన్ని దేవాదాయశాఖ ఆధ్వర్యంలో పునఃప్రతిష్ఠించారు. భూ అంతర్భాగంలో ఏర్పాటైన సోమసూత్రాన్ని మాత్రం చక్కదిద్దలేకపోయారు. అభిషేకాల సమయంలో వచ్చే జలాన్ని పూజారులు బిందెలతో తోడుకుని బయటకు తీసుకెళ్లేవారు. కిషన్‌రెడ్డి ఆదేశాలతో గత నెల రోజులుగా పురావస్తుశాఖ అధికారులు నిపుణులతో పలుమార్లు చర్చించి కంపనాలు లేని యంత్రాన్ని తెప్పించారు. సోమసూత్రం దారికి అడ్డుగా వచ్చిన రాయిని జాగ్రత్తగా కత్తిరించి పైపును బిగించారు. అక్కడి నుంచి ఆలయ ప్రహరీ వరకు ప్రత్యేక పైపు సాయంతో సోమసూత్రం ద్వారా వచ్చే జలం బయటకు వెళ్లేలా ఏర్పాట్లు చేశారు.