పాక్‌లో సైన్యమే అత్యంత నమ్మకమైన సంస్థ

 తాజా సర్వేలో వెల్లడి

ఇస్లామాబాద్‌: సార్వత్రిక ఎన్నికల ముంగిట పాకిస్థాన్‌లో నిర్వహించిన ఓ సర్వేలో అత్యంత నమ్మకమైన సంస్థగా ‘పాకిస్థాన్‌ సైన్యం’ అవతరించింది. ఈ మేరకు ఇప్సోస్‌ పాకిస్థాన్‌ అనే సంస్థ నిర్వహించిన సర్వేలో సైన్యానికి 74 శాతం ఆమోదం లభించింది. సర్వేలో ప్రస్తావించిన ఎనిమిదింటిలో ఆశ్చర్యకరంగా ఎన్నికల సంఘం అట్టడుగున నిలిచింది. సర్వేలో భాగంగా 18-34 ఏళ్ల మధ్య వయసున్న 2,050 మందిని ప్రశ్నించినట్లు ద న్యూస్‌ ఇంటర్నేషనల్‌ దినపత్రిక తెలిపింది. 58 శాతం ఆమోదంతో పాకిస్థాన్‌ సుప్రీంకోర్టు రెండో స్థానంలో నిలిచిందని, ఆ తర్వాత స్థానాన్ని మీడియా దక్కించుకుందని వెల్లడించింది. ఈ నెల ఎనిమిదో తేదీన జరగనున్న ఎన్నికల్లో ఓటు హక్కు వినియోగించుకుంటారా? అన్న ప్రశ్నకు 70 శాతం మంది అవునని సమాధానమిచ్చారు.