అమెరికాలో మరోసారి కాల్పుల మోత

నలుగురు అధికారులు, నిందితుడి మృతి

షార్లెట్‌: కాల్పుల మోతతో అగ్రరాజ్యం అమెరికా మరోసారి ఉలిక్కిపడింది. నార్త్‌ కరోలినాలోని షార్లెట్‌లో వారెంటు అందించేందుకు వెళ్లిన పోలీసులపై కాల్పులకు తెగబడ్డాడు ఓ దుండగుడు. ఈ అనూహ్య దాడిలో నలుగురు పోలీసులు మృతిచెందారు. మరో నలుగురు తీవ్రంగా గాయపడ్డారు. వీరంతా యూఎస్‌ మార్షల్స్‌ టాస్క్‌ ఫోర్స్‌కు చెందిన అధికారులు. అక్రమంగా ఆయుధాలను కలిగి ఉన్నాడన్న కారణంతో వారెంటును అందించేందుకు సోమవారం కొంతమంది అధికారులు ఓ నిందితుడి ఇంటికి వెళ్లారు. వీరి రాకను గమనించిన నిందితుడు దాడికి దిగడంతో  మూడు గంటలపాటు ఎదురుకాల్పులు జరిగాయి. ఈ ఘటనలో నిందితుడితోపాటు మరో నలుగురు అధికారులు మృతిచెందారు. అనంతరం ఆ ఇంటిలో నివసిస్తున్న ఓ మహిళ, 17ఏళ్ల యువకుడిని అధికారులు అదుపులోకి తీసుకున్నారు. మరో రైఫిల్‌ను సైతం స్వాధీనం చేసుకున్నారు.