శ్వేతసౌధం ప్రహరీ గేటును ఢీకొన్న కారు: డ్రైవర్‌ దుర్మరణం

వాషింగ్టన్‌: అమెరికా అధ్యక్షుడి అధికారిక నివాసమైన శ్వేతసౌధం ప్రహరీ గేటును కారు ఢీకొట్టిందని, ఈ ఘటనలో డ్రైవర్‌ దుర్మరణం పాలయ్యాడని అధికారులు తెలిపారు. శనివారం రాత్రి 10.30 గంటల సమయంలో (అమెరికా కాలమానం ప్రకారం) ప్రమాదం సంభవించిందని, కారులోనే డ్రైవర్‌ మరణించాడని అమెరికా సీక్రెట్‌ సర్వీస్‌ సంస్థ ఓ ప్రకటనలో తెలిపింది. బాధితుడి వివరాలు తెలియాల్సి ఉందని వెల్లడించింది. 15వ వీధి, పెన్సిల్వేనియా ఎవెన్యూ ఎన్‌డబ్ల్యూ కూడలిలో చోటుచేసుకున్న ఈ ఘటనను కేవలం కారు నడిపే క్రమంలో చోటుచేసుకున్న ప్రమాదంగానే భావిస్తున్నట్లు అధికారులు తెలిపారు. అధ్యక్షుడి నివాస భవనానికి ఎలాంటి ముప్పు లేదని స్పష్టంచేశారు. ఘటన జరిగిన సమయంలో అధ్యక్షుడు బైడెన్‌ శ్వేతసౌధంలో లేరు.