Israel: గాజాపై యుద్ధం మరిన్ని నెలలపాటు కొనసాగొచ్చు: ఐడీఎఫ్‌ చీఫ్‌

జెరూసలెం: హమాస్‌ (Hamas) అంతమే లక్ష్యంగా ఇజ్రాయెల్‌ సైన్యం (Idf) గాజా (gaza) పై దాడులు కొనసాగిస్తోంది. ఈ క్రమంలో అక్కడి అమాయక ప్రజలు తీవ్ర ఇబ్బందులు ఎదుర్కొంటున్నారు. వారికి సాయం చేయడానికి వీలుగా యుద్ధానికి విరామం ఇవ్వాలని ఐరాస, అంతర్జాతీయ సంస్థలు కోరుతున్నా.. ఇజ్రాయెల్‌ దాడుల్ని ఆపట్లేదు. పైగా.. ఈ యుద్ధం మరిన్ని నెలలపాటు కొనసాగొచ్చని ఇజ్రాయెల్‌ ఆర్మీ చీఫ్‌ హర్జీ హెలెవీ తాజాగా స్పష్టం చేశారు. ఈ మేరకు గాజా సరిహద్దుల్లో హర్జీ మీడియాతో మాట్లాడారు.

‘‘ఉగ్రవాద సంస్థలను నిర్మూలించడానికి మాయాజాలపు పరిష్కారాలు, అడ్డదారులు ఉండవు. దానికి దృఢ సంకల్పం, నిరంతర పోరాటం అవసరమవుతాయి. మేం అలాగే పోరాడుతున్నాం. ఎలాగైనా హమాస్‌ నాయకత్వాన్ని చేరుకొని సమూలంగా అంతమొందిస్తాం. ఈ క్రమంలో మా యుద్ధం మరిన్ని నెలలపాటు కొనసాగొచ్చు. ఈ విషయాన్ని ముందే చెప్పాం. దీర్ఘకాలిక లక్ష్యాలను సాధించడానికి కాస్త సమయం పడుతుంది. అందుకే, మేం విభిన్న పద్ధతులను అవలంబించబోతున్నాం. ఇజ్రాయెల్‌కు శత్రువులు ఉండకూడదు. అదే మా లక్ష్యం’’అని హర్జీ మీడియాకు తెలిపారు.