North Korea: అమెరికాను బెదిరించి.. ఆపై క్షిపణి ప్రయోగం..

ఇంటర్నెట్‌డెస్క్‌: కొరియా ద్వీపకల్పం మరోసారి ఉద్రిక్తంగా మారింది. అమెరికాను బెదిరించిన మర్నాడే ఉత్తర కొరియా ఖండాంతర బాలిస్టిక్‌ క్షిపణి పరీక్ష నిర్వహించింది. ఈ విషయాన్ని జపాన్‌, ఉత్తరకొరియా అధికారులు ధ్రువీకరించారు. ఈ క్షిపణి జపాన్‌ సముద్ర జలాల్లో బుధవారం ఉదయం పడింది. ఇది తూర్పు దిశగా కొంత సేపు పయనించి జపాన్‌ కాలమానం ప్రకారం ఉదయం 11.15 సమయంలో సముద్ర జలాల్లో పడింది. ఈ విషయాన్ని ఆ దేశ కోస్ట్‌గార్డ్‌ వెల్లడించింది. 

ఉ.కొరియా నియంత్‌ కిమ్‌ సోదరి యో జోంగ్‌ నిన్న అమెరికాపై నిప్పులు చెరిగారు. వాషింగ్టన్‌కు చెందిన నిఘా విమానాలు తమ భూభాగంలోకి చొరబడితే కూల్చేస్తామని హెచ్చరించారు. దీంతో ప్యాంగ్యాంగ్‌ దూకుడును తట్టుకొనేందుకు దక్షిణ కొరియా, అమెరికా, జపాన్‌ దేశాలు కూడా సంయుక్త యుద్ధ విన్యాసాలను పెంచాయి.

• ఇదీ చదవండి: నాటోలోకి స్వీడన్‌

మరోవైపు ఉత్తర కొరియా ఆరోపణలను అమెరికా తోసిపుచ్చింది. తమ సైనిక గస్తీ కార్యకలాపాలు సరిహద్దులకు లోబడే జరుగుతున్నాయని పేర్కొంది. 2022 ఆరంభం నుంచి ఇప్పటివరకు ఉత్తర కొరియా మొత్తం 100కి పైగా క్షిపణి ప్రయోగాలు నిర్వహించింది. ఈ ఏడాది ఓ నిఘా ఉపగ్రహ ప్రయోగానికి కూడా ఉత్తరకొరియా విఫలయత్నం చేసింది. గత ఏప్రిల్‌లో అత్యంత శక్తిమంతమైన ఖండాంతర క్షిపణిని ప్రయోగించింది. అమెరికా ప్రధాన భూభాగాన్ని తాకే శక్తి ఉన్న ఐసీబీఎంలను ఉ.కొరియా అభివృద్ధి చేస్తోంది.