India - UK on Vintage Car: వింటేజ్‌ కారులో కుటుంబాన్ని వెంటేసుకుని!

భారత్‌ నుంచి బ్రిటన్‌కు బయలుదేరిన గుజరాత్‌ వ్యాపారి

లండన్‌: అహ్మదాబాద్‌కు చెందిన నిర్మాణరంగ పరికరాల తయారీ వ్యాపారి అరుదైన వింటేజ్‌ కారులో సాహసోపేత రోడ్డు యాత్రకు శ్రీకారం చుట్టారు. దమన్‌ ఠాకుర్‌(50) తన తండ్రి(75), కుమార్తె(21), మిత్రుడితో కలిసి తమ కుటుంబానికి చెందిన ‘లాల్‌పరీ’ అనే పేరున్న 1950 ఎంజీ వైటీ వింటేజ్‌ కారులో బ్రిటన్‌కు బయలుదేరారు. మన దేశానికి స్వాతంత్య్రం వచ్చి 76 ఏళ్లు పూర్తయిన సందర్భానికి గుర్తుగా 73 ఏళ్ల క్రితం తమ కారు తయారైన ఆగ్నేయ ఇంగ్లాండ్‌లోని అబింగ్డన్‌లోని ఎంజీ కర్మాగారం వరకు వెళ్లాలని నిర్ణయించుకున్నారు. ఈ మేరకు 16 దేశాల మీదుగా 12 వేల కిలోమీటర్ల యాత్రను మంగళవారం ప్రారంభించారు. తొలుత సర్దార్‌ సరోవర్‌లోని సర్దార్‌ వల్లబ్‌భాయ్‌ పటేల్‌ విగ్రహాన్ని దర్శించుకుంటారు. తర్వాత ముంబయికి చేరుకుని, అక్కడి నుంచి దుబాయికి ఓడలో వెళతారు. అక్కడి నుంచే అధికారిక యాత్ర మొదలవుతుంది.