Iran: అమెరికా దూరంగా ఉండు.. నెతన్యాహు ఉచ్చులో పడొద్దు..: ఇరాన్‌ మెసేజ్‌

ఇంటర్నెట్‌డెస్క్: సిరియా రాజధాని డమాస్కస్‌లోని ఇరాన్‌ (Iran) రాయబార కార్యాలయ కాన్సులర్‌ విభాగంపై జరిగిన గగనతల దాడిలో ఏడుగురు అధికారులు మృతి చెందిన సంగతి తెలిసిందే. వారిలో ఇరాన్‌ సైన్యానికి చెందిన ఉన్నతాధికారులు ఉన్నారు. ఇందుకు ప్రతిగా ఇజ్రాయెల్‌ (Israel)పై ఆ దేశం ఏక్షణమైనా దాడి చేయొచ్చనే అంచనాల మధ్య తీవ్ర ఉద్రిక్తతలు నెలకొన్నాయి. ఈ ప్రతిదాడి విషయంలో అమెరికా(USA) దూరంగా ఉండాలని తాము అడిగినట్లు ఇరాన్‌ వెల్లడించింది. ఈ మేరకు వాషింగ్టన్‌కు సందేశం పంపినట్లు తెలిపింది.(Israel-Hamas Conflict)

‘‘అమెరికా జాగ్రత్త..  నెతన్యాహు ఉచ్చులో పడొద్దు. ఈ విషయంలో మీరు దూరంగా ఉండాలి.. అలా అయితే మీపై దాడి జరగదు’’ అని యూఎస్‌కు వెల్లడించినట్లు ఇరాన్ ఉన్నతాధికారి మహమ్మద్‌ జంషిది ఒకరు ఎక్స్(ట్విటర్) వేదికగా వెల్లడించారు. అయితే ఈ పోస్టుపై అగ్రరాజ్యం నుంచి ఎలాంటి స్పందనా రాలేదు.

హెచ్చరించిన అమెరికా.. దిగొచ్చిన ఇజ్రాయెల్‌

ఈ ఉద్రిక్తతల వేళ.. అమెరికా హై అలర్ట్‌లో ఉందని అధికారిక వర్గాలను ఉటంకిస్తూ అంతర్జాతీయ మీడియా వెల్లడించింది. ఇజ్రాయల్‌లో దాడి జరగొచ్చని, అది నిఘా, మిలిటరీ స్థావరాల లక్ష్యంగా ఉండొచ్చని జో బైడెన్ ప్రభుత్వం అంచనా వేస్తోంది. అలాగే మధ్యప్రాచ్యంలోని తన స్థావరాలను భద్రంగా ఉంచేందుకు తగిన చర్యలు తీసుకుంటోంది.