థియేటర్‌లో సినిమా చూసిన అనుభూతి ఎంత బాగుంటుందో. కానీ, ఇంట్లో పసిపిల్లలు ఉన్నప్పుడు అలా వెళ్లి చూడటం కుదరదు. అలాగని పిల్లల్ని వదిలేసి వెళ్లలేం. ఒకవేళ ధైర్యం చేసి థియేటర్‌కి తీసుకెళ్లినా ఆ శబ్దాలకి ఏడవడం, నిద్రపోకుండా చిరాకు చేయడం వంటివి చేస్తుంటారు. దాంతో మిగతా ప్రేక్షకులకీ ఇబ్బంది కలుగుతుంది. అందుకే, సినిమా మధ్యలోనే ఇంటికెళ్లిపోవడం తప్ప తల్లిదండ్రులకు మరో ఆప్షన్‌ ఉండదు. ఇటువంటి ఇబ్బందులను తొలగించడానికి కేరళ ప్రభుత్వం ఓ వినూత్న ఆలోచన చేసింది. కేరళ రాష్ట్ర చలనచిత్ర అభివృద్ధి సంస్థ (కేఎస్‌ఎఫ్‌డీసీ) నిర్వహించే కైరాళి శ్రీనీల థియేటర్‌లో పసిపిల్లలకోసం ‘క్రైయింగ్‌ రూమ్‌’ పేరిట ప్రత్యేక గదిని ఏర్పాటు చేసింది. పసివాళ్లు ఏడుపందుకోగానే వాళ్లను పారదర్శకంగా అద్దాలతో నిర్మించిన ఆ గదిలోకి తీసుకెళ్లిపోవచ్చు. అది సౌండ్‌ ప్రూఫ్‌ గది కావడంతో అందులోంచి పిల్లల ఏడుపులు బయటికి వినపడవు. బయట శబ్దాలు చాలా నిదానంగా లోపలికి వినిపిస్తాయి. పిల్లల్ని సముదాయించుకుంటూనే సినిమా చూసే వెసులుబాటున్న ఆ గదిలో తల్లిపాలు ఇవ్వడంతోపాటు, డైపర్లూ మార్చుకునే సౌలభ్యం ఉంటుంది. పిల్లల ఏడుపుతో మిగిలిన ప్రేక్షకులకూ ఎటువంటి అసౌకర్యమూ కలగదు. తల్లిదండ్రులకు వినోదాన్ని పంచాలనే లక్ష్యంతో ఏర్పాటైన ఈ గదుల్లో చక్కగా పిల్లలను లాలిస్తూ సినిమాను ఎంజాయ్‌ చేయవచ్చన్న మాట.