చాలామంది టూ వీలర్‌పైన పిల్లల్నీ ఎక్కించుకుని తీసుకెళ్తుంటారు. అలాంటి సమయాల్లో కాస్త పెద్దపిల్లలైతే జారి పడిపోకుండా ఎలాగోలా పట్టుకుంటారు కానీ చిన్న పిల్లలతోనే ఇబ్బంది. అటూ ఇటూ కదులుతూ ఉండటమో, నిద్రపోవడమో చేస్తుంటారు. అందుకే ప్రయాణం చేస్తున్నంతసేపూ వాళ్లమీద ఓ కన్నేసే ఉంచాలి. బైక్‌ మీద ఇద్దరు పెద్దవాళ్లు ఉన్నప్పుడు పర్వాలేదు కానీ అమ్మనో, నాన్ననో ఒక్కరే డ్రైవింగ్‌ చేస్తూ పిల్లలతో వెళ్లాలంటే మాత్రం చాలా కష్టంగా ఉంటుంది. అలాంటప్పుడూ ఏ ఇబ్బందీ లేకుండా, పిల్లలు పడిపోతారన్న బెంగా లేకుండా ఉండాలా... అయితే ఈ టూ వీలర్‌ బేబీ బెల్ట్‌ను కొనుక్కోవాల్సిందే. బ్యాక్‌ప్యాక్‌లా ఉండే ఈ బెల్ట్‌... అటు చిన్నారుల్నీ ఇటు మనల్నీ కలుపుతుంది. దీనివల్ల బుజ్జాయిలు ఎటూ కదలకుండా ఉంటారు. పిల్లల బొమ్మలతో, రకరకాల పరిమాణాల్లో మార్కెట్లో దొరుకుతున్నాయివి. వాటిల్లో మనకు అవసరమైన దాన్ని ఎంచుకుంటే సరిపోతుంది!