ఐసుముక్కతో ఇబ్బంది పడక్కర్లేదు

చర్మసంరక్షణలో భాగంగా అప్పుడప్పుడూ ఐసుముక్కతో ముఖానికి మర్దన చేయడం... ఎండాకాలంలో వేడి ప్రభావాన్ని తగ్గించేందుకు చల్లని ఐసుముక్కను ముఖంపైన రాసుకోవడం చాలామంది చేసేదే. కానీ చల్లని ఐసు ముక్కను ఆ కాసేపూ చేత్తో పట్టుకోవడం అంటే కాస్త ఇబ్బందిగానే ఉంటుంది. ఆ సమస్య లేకుండా చేసేందుకే ఇప్పుడు ప్రత్యేకంగా ‘ఐస్‌రోలర్‌’ను అందుబాటులోకి తెచ్చారు తయారీదారులు.

సిలికాన్‌తో తయారుచేసిన ఈ రోలర్‌ చూడ్డానికి చిన్న ఐస్‌మౌల్డ్‌లా ఉంటుంది. ఇందులో నీళ్లు నింపి ఫ్రిజ్‌లో పెట్టేస్తే చాలు. ఆ తరవాత మౌల్డ్‌ను చేత్తో పట్టుకుని ముఖానికి ఐసుతో మర్దన చేసుకోవచ్చు. పైగా కేవలం నీళ్లే కాకుండా అప్పుడప్పుడూ కీరా గుజ్జూ, గ్రీన్‌టీ, నిమ్మరసం, గులాబీరేకలు వంటివన్నీ కూడా వేసుకుని నచ్చిన ఐస్‌ప్యాక్‌ను కూడా తయారుచేసుకోవచ్చు.