Trump Jr.: భారత్‌లో పర్యటించనున్న డొనాల్డ్‌ ట్రంప్‌ జూనియర్‌..!

ముంబయి: అమెరికా(America) మాజీ అధ్యక్షుడు డొనాల్డ్‌ ట్రంప్‌ తనయుడు, ట్రంప్‌ సంస్థల ఉపాధ్యక్షుడు డొనాల్డ్‌ ట్రంప్‌ జూనియర్‌(Donald Trump Jr.) భారత్‌కు రానున్నారు. ఇక్కడ రియల్‌ ఎస్టేట్‌ వ్యాపారాన్ని విస్తరించడంలో భాగంగా ఆయన ఈ నెలలోనే పర్యటించనున్నట్లు సమాచారం. ముంబయి కేంద్రంగా ఉన్న ట్రైబెకా డెవలపర్స్‌(Tribeca Developers) భాగస్వామ్యంతో ట్రంప్‌ సంస్థ.. భారత మార్కెట్‌లోకి ప్రవేశించింది.

ట్రైబెకా సంస్థ 10వ వార్షికోత్సవం సందర్భంగా ఏర్పాటు చేసే కార్యక్రమంలో జూనియర్‌ ట్రంప్‌ పాల్గొనే అవకాశం ఉన్నట్లు ఆ సంస్థ ఓ ప్రకటనలో తెలిపింది. ట్రంప్‌, ట్రైబెకా సంస్థలు భారత్‌లో ‘ట్రంప్‌’ బ్రాండ్‌ కింద లగ్జరీ ప్రాజెక్టుల నిర్మాణానికి లోధా గ్రూపు వంటి స్థానిక డెవలపర్లతో ఒప్పందం కుదుర్చుకున్నాయి. ఈ మేరకు ఇప్పటికే నాలుగు లగ్జరీ ప్రాజెక్టులను ప్రకటించాయి. దిల్లీ, కోల్‌కతా, పుణె, ముంబయిలలో ‘ట్రంప్‌ టవర్‌’ల పనులు చేపట్టగా.. పుణెలో ఇప్పటికే పూర్తయ్యింది.