Budget 2023: పేద ఖైదీలకు అవసరమైన ఆర్థిక సాయం

దిల్లీ: పెనాల్టీ లేదా బెయిల్ మొత్తాన్ని భరించలేని పేద ఖైదీలకు తోడ్పాటు అందించనున్నటు కేంద్ర ఆర్థిక మంత్రి నిర్మలా సీతారామన్(Nirmala Sitharaman) వెల్లడించారు. ఈ అమృత్ కాలానికి పార్లమెంట్‌లో ప్రవేశపెట్టిన తొలి పద్దు(Budget 2023)లో మంత్రి ఈ విషయాన్నివెల్లడించారు. ‘బెయిల్‌ లేదా పెనాల్టీ మొత్తాలను భరించలేని  జైల్లో ఉన్న పేదలకు అవసరమైన ఆర్థిక సహాయం అందిస్తాం’ అని మంత్రి వెల్లడించారు. 

గత ఏడాది నిర్వహించిన హైకోర్టు ప్రధాన న్యాయమూర్తులు, ముఖ్యమంత్రులు సంయుక్త సదస్సు ప్రారంభ కార్యక్రమంలో ప్రధాన మంత్రి మాట్లాడుతూ.. జైల్లో మగ్గుతున్న అండర్‌ ట్రయల్‌ ఖైదీలకు సంబంధించిన కేసులకు మొదటి ప్రాధాన్యం ఇవ్వాలని అభ్యర్థించారు. అలాగే చట్టప్రకారం సున్నితత్వం ఆధారంగా వారిని విడుదల చేయాలని సూచించారు. ప్రతి జిల్లాలో జిల్లా న్యాయమూర్తి ఆధ్వర్యంలో కమిటీ ఏర్పాటు చేయడం ద్వారా ఈ కేసులను సమీక్షించవచ్చని, అవసరమైన చోట ఖైదీలను బెయిల్‌పై విడుదల చేయొచ్చని చెప్పారు.