అదానీ గ్రూప్‌ రూ.1.2 లక్షల కోట్ల పెట్టుబడులు

2024-25 ప్రణాళికలు

దిల్లీ: వచ్చే ఆర్థిక సంవత్సరం (2024-25)లో రూ.1.2 లక్షల కోట్లు (దాదాపు 14 బి.డాలర్లు) పెట్టుబడులు పెట్టేందుకు గౌతమ్‌ అదానీ నేతృత్వంలోని అదానీ గ్రూప్‌ సిద్ధమవుతోంది. ఇంధన, విమానాశ్రయాలు, కమొడిటీస్‌, సిమెంట్‌, మీడియా సహా పలు గ్రూప్‌ కంపెనీల్లో ఈ పెట్టుబడులు పెట్టనుంది. వచ్చే 7-10 ఏళ్లలో 100 బిలియన్‌ డాలర్ల (దాదాపు రూ.8.3 లక్షల కోట్ల) పెట్టుబడులు పెట్టాలనే ప్రతిపాదనలను అదానీ గ్రూప్‌ ఇంతకు ముందు వెల్లడించింది. ఇందులో ఎక్కువ భాగం పునరుత్పాదక ఇంధనం, హరిత హైడ్రోజన్‌, విమానాశ్రయ వ్యాపారాల్లో పెట్టనుంది. మూలధన వ్యయాల ప్రణాళికల ప్రకారం..70% పెట్టుబడులు పునరుత్పాదక ఇంధనం, గ్రీన్‌ హైడ్రోజన్‌, గ్రీన్‌ ఎవాక్యూయేషన్‌ల్లో.. మిగతా 30% నిధులను విమానాశ్రయాలు, పోర్ట్‌ వ్యాపారాలకు వెచ్చించనున్నారు.

2023-24లో గ్రూప్‌ మూలధన వ్యయాలతో పోలిస్తే 2024-25 పెట్టుబడుల అంచనాలు 40% అధికమని తెలుస్తోంది. ప్రస్తుత ఆర్థిక సంవత్సరంలో మూలధన వ్యయాలు దాదాపు 10 బిలియన్‌ డాలర్లు (సుమారు రూ.83,000 కోట్లు)గా ఉండొచ్చని విశ్లేషకులు అంచనా వేస్తున్నారు.

2023లో ఇలా: 2023లో గ్రూప్‌ కంపెనీలు 9.5 బిలియన్‌ డాలర్ల ఎబిటా (2022తో పోలిస్తే 34.4% ఎక్కువ) నమోదు చేశాయి. 2023 మార్చి నుంచి సెప్టెంబరు మధ్య నికర రుణాలు 4% తగ్గాయి. డిసెంబరు త్రైమాసికంలో అదానీ కంపెనీల ఎబిటా రికార్డు స్థాయిలో 63.6% పెరిగింది. దీంతో 2023లో ఎబిటా జీవనకాల గరిష్ఠమైన 9.5 బి.డాలర్లు(దాదాపు రూ.78,823 కోట్లు)గా నమోదైంది. నగదు నిల్వలు, లాభాలు పెరగడంతో గ్రూప్‌ భారీ పెట్టుబడులకు రంగం సిద్ధం చేస్తోందని సమాచారం. సెప్టెంబరుకు ఎబిటాతో పోలిస్తే నికర రుణాలు 2.5 రెట్లుగా ఉండగా, 2023-24 చివరకు ఇది మరింత తగ్గనుంది.