Interest Rates: మరో పావు శాతం వడ్డన తప్పదు.. ఆర్‌బీఐ వడ్డీరేట్ల పెంపుపై నిపుణుల అంచనా

ముంబయి: ద్రవ్యోల్బణం ఇంకా ఆర్‌బీఐ లక్ష్యిత పరిధి కంటే ఎగువనే ఉంది. మరోవైపు అమెరికా ఫెడరల్‌ రిజర్వ్‌ సహా ఇతర దేశాల కేంద్ర బ్యాంకులు సైతం కఠిన ద్రవ్య విధానాన్నే కొనసాగిస్తున్నాయి. ఈ నేపథ్యంలో ఆర్‌బీఐ వచ్చే పరపతి విధాన సమీక్షలో వడ్డీరేట్ల (Interest Rates)ను మరో 25 బేసిస్‌ పాయింట్లు పెంచే అవకాశం ఉందని నిపుణులు అభిప్రాయపడుతున్నారు. ఆర్‌బీఐ ద్వైమాసిక పరపతి విధాన సమీక్ష సమావేశాలు ఏప్రిల్‌ 3, 5, 6 తేదీల్లో జరగనున్నాయి. ఏప్రిల్‌ 6న గవర్నర్‌ శక్తికాంత దాస్‌ సమావేశ నిర్ణయాలను ప్రకటిస్తారు.

రిటైల్‌ ద్రవ్యోల్బణం ఇంకా ఎగువస్థాయిల్లోనే కొనసాగుతుండడంపై ఆర్‌బీఐ సమావేశంలో ప్రధానంగా చర్చించే అవకాశం ఉందని నిపుణులు తెలిపారు. అలాగే అమెరికా ఫెడరల్‌ రిజర్వు సహా బ్యాంక్‌ ఆఫ్‌ ఇంగ్లండ్‌ ఇటీవల వడ్డీరేట్లను పెంచిన అంశాన్నీ ఆర్‌బీఐ పరిగణనలోకి తీసుకోవచ్చని పేర్కొన్నారు. ఈ రెండే ఆర్‌బీఐ నిర్ణయాలను ప్రభావితం చేసే అవకాశం ఉందన్నారు.

భారీగా పెరిగిన ద్రవ్యోల్బణాన్ని కట్టడి చేసేందుకు రిజర్వ్‌ బ్యాంక్‌ ఆఫ్‌ ఇండియా 2022 మే నుంచి వరుసగా వడ్డీరేట్లను పెంచుతూ వస్తోంది. రష్యా- ఉక్రెయిన్‌ యుద్ధం నేపథ్యంలో ప్రపంచవ్యాప్తంగా ద్రవ్యోల్బణం భారీగా పెరిగిన విషయం తెలిసిందే. ఫిబ్రవరిలో జరిగిన చివరి ద్వైమాసిక సమీక్షలో ఆర్‌బీఐ రెపోరేటును 25 బేసిస్‌ పాయింట్లు పెంచి 6.50 శాతానికి చేర్చింది. 2022 నవంబరు, డిసెంబరులో ద్రవ్యోల్బణం ఆర్‌బీఐ లక్ష్యిత పరిధి అయిన 6 శాతానికి దిగువకు చేరింది. తిరిగి జనవరి, ఫిబ్రవరిలో వరుసగా 6.52 శాతం, 6.44 శాతంగా నమోదైంది.