Reliance: మరో బెవరేజెస్‌ కంపెనీలో రిలయన్స్‌కు మెజారిటీ వాటా

ముంబయి: ఎఫ్‌ఎంసీజీ వ్యాపారంలో వేగంగా విస్తరిస్తున్న రిలయన్స్‌ (Reliance) ఇండియా మరో ముందడుగు వేసింది. గుజరాత్‌ కేంద్రంగా పనిచేస్తున్న ‘సొస్యో హజూరీ బెవరేజెస్‌ ప్రైవేట్‌ లిమిటెడ్‌ (SHBPL)’లో ‘రిలయన్స్‌ కన్జ్యూమర్‌ ప్రొడక్ట్స్‌ లిమిటెడ్‌’ 51 శాతం వాటాలను కొనుగోలు చేయనుంది. సోస్యో బ్రాండ్‌ పేరిట ఎస్‌హెచ్‌బీపీఎల్‌ పలు రకాల పానీయాలను విక్రయిస్తోంది. కంపెనీలో మిగిలిన వాటాలు ప్రస్తుత ప్రమోటర్‌ హజూరీ కుటుంబం చేతిలోనే ఉండనున్నాయి.

పండ్ల రసాలు, కార్బొనేటెడ్‌ సాఫ్ట్‌ డ్రింక్స్‌ వ్యాపారంలో సొస్యో దాదాపు 100 ఏళ్లుగా కార్యకలాపాలు నిర్వహిస్తోంది. ఈ కంపెనీని 1923లో అబ్బాస్‌ అబ్దుల్‌రహీమ్‌ హజూరీ స్థాపించారు. దేశీయ సాఫ్ట్‌ డ్రింక్స్‌ విపణిలో ఈ కంపెనీకి పెద్ద వాటానే ఉంది. సొస్యో, కశ్మీరా, లెమీ, గిన్‌లిమ్‌, రన్నర్‌, ఓపెనర్‌, హజూరీ సోడా బ్రాండ్ల పేరిట 100 రకాలకు పైగా ఫ్లేవర్లలో పానీయాలను విక్రయిస్తోంది. ముఖ్యంగా గుజరాత్‌లో ఈ కంపెనీ ఉత్పత్తులకు మంచి ఆదరణ ఉంది.

రిలయన్స్‌ ఇప్పటికే పానీయాల రంగంలో ‘కంపా’ బ్రాండ్‌ను కొనుగోలు చేసిన విషయం తెలిసిందే. సొస్యోకు కొత్త రకాల పానీయాలను రూపొందించడంలో మంచి అనుభవం ఉంది. కంపా బ్రాండ్‌కు ఉన్న గుర్తింపు, కొత్త రకాల పానీయాల తయారీలో సొస్యోకు ఉన్న అనుభవం రిలయన్స్‌ బెవరేజెస్‌ సెగ్మెంట్‌ బలోపేతానికి ఉపయోగపడనున్నాయి.