AMTD Digital: ₹619 పెట్టుబడికి ₹2 లక్షల లాభం.. నమ్మశక్యంగా లేదా?

AMTD Digital: ఏఎంటీడీ డిజిటల్‌ అనే కంపెనీ కేవలం మూడు వారాల్లో 32,000 శాతం రిటర్న్స్‌తో మదుపర్లకు లాభాల కుంభవృష్టి కురిపించింది...

Updated : 04 Aug 2022 13:15 IST

న్యూయార్క్‌: ఉక్రెయిన్‌-రష్యా యుద్ధం సహా పలు కారణాల వల్ల ప్రపంచవ్యాప్తంగా స్టాక్‌ మార్కెట్లు (Stock Market) గతకొన్ని నెలలుగా తీవ్ర ఒడుదొడుకుల్లో చలిస్తున్నాయి. అయితే, జులై నుంచి పరిస్థితి కొంత మెరుగుపడింది. ఏప్రిల్, జూన్‌ నాటి కనిష్ఠాలతో పోలిస్తే సూచీలు క్రమంగా కోలుకుంటున్నాయి. ఏదేమైనప్పటికీ.. ఈ తరుణంలో మార్కెట్లోకి ప్రవేశించడానికి సామాన్య మదుపర్లు జంకుతున్నారనే చెప్పాలి. లాభాల మాట అటుంచితే.. నష్టాలు రాకుండా ఉంటే చాలనుకునేవారే ఎక్కువ. ఇలాంటి పరిస్థితుల్లో ఓ స్టాక్‌ 32,000 శాతం లాభం ఇస్తే ఎలా ఉంటుంది? బుల్‌ మార్కెట్లోనూ సాధ్యం కాని ఈ అనూహ్య పరిణామం ఇప్పుడు జరిగిందంటే నమ్మశక్యంగా లేదు కదా! కానీ, దీన్ని మీరు నమ్మాల్సిందే. ఎందుకంటే.. హాంకాంగ్‌ కేంద్రంగా పనిచేస్తున్న ఏఎంటీడీ డిజిటల్‌ (AMTD Digital) మదుపర్లకు లాభాల కుంభవృష్టి కురిపించింది మరీ!

ఏఎంటీడీ డిజిటల్‌ (AMTD Digital) జులై 15న న్యూయార్క్‌ స్టాక్‌ ఎక్స్ఛేంజీల్లో నమోదైంది. దీని ఇష్యూ ధర 7.80 డాలర్లు కాగా.. 16.81 డాలర్ల వద్ద లిస్టయ్యింది. అంటే లిస్టింగ్‌లోనే 115 శాతం లాభాన్నిచ్చింది. అంతటితో ఆగలేదు. బుధవారం (ఆగస్టు 3, 2022) స్టాక్‌ మార్కెట్లు ముగిసే సమయానికి ఈ స్టాక్‌ ధర 11,00 డాలర్లు. అంటే కేవలం మూడు వారాల్లో ఇష్యూ ధరతో పోలిస్తే మదుపర్లకు 1,4002 శాతం రాబడినిచ్చింది. మరోవైపు ఈ స్టాక్‌ ఆగస్టు 2న 2,555.30 డాలర్ల వద్ద గరిష్ఠాన్ని తాకింది. ఐపీఓలో షేర్లు దక్కించుకొని ఈ ధర వద్ద విక్రయించిన వారికి దాదాపు 32,660 శాతం రాబడి వచ్చింది. ఈ పరిణామాన్ని సులువుగా అర్థం చేసుకోవడానికి మన కరెన్సీలో చెప్పుకొంటే.. దాదాపు రూ.619 వద్ద ఐపీఓలో షేరు దక్కించుకొని ఆగస్టు 2న బయటకొచ్చిన వారికి ఒక్కో షేరుపై రూ.2,02,395 లాభం వచ్చింది. అదే ఇప్పటికీ షేరును అట్టిపెట్టుకొని ఉండి ఉంటే ఆ షేరు ధర రూ.87,378.50గా ఉంది.

డిజిటల్‌ బిజినెస్‌, ఫైనాన్షియల్‌ సర్వీసెస్‌ కార్యకలాపాల్లో ఉన్న ఈ సంస్థ ప్రస్తుత మార్కెట్‌ క్యాపిటలైజేషన్‌ 203 బిలియన్‌ డాలర్లు. ఈ విషయంలో ఆర్థిక దిగ్గజాలైన వెల్స్‌ ఫార్గో, మోర్గాన్‌ స్టాన్లీ, గోల్డ్‌మన్‌ శాక్స్‌ సంస్థల్ని సైతం దాటేసింది. పైగా ఏప్రిల్‌ 2021 నాటికి ఈ కంపెనీ ఆదాయం 25 మిలియన్‌ డాలర్లే కావడం గమనార్హం. మార్కెట్‌ విలువ పరంగా ఇప్పుడు ఈ కంపెనీ ప్రపంచంలోనే ఐదో అతిపెద్ద ఆర్థిక సంస్థ. బెర్క్‌షైర్‌ హాత్‌వే, జేపీ మోర్గాన్‌ చేజ్‌, బ్యాంక్‌ ఆఫ్‌ అమెరికా, ఇండస్ట్రియల్‌ అండ్‌ కమర్షియల్‌ బ్యాంక్‌ ఆఫ్‌ చైనా వంటి దిగ్గజాల సరసన చేరింది.

అయితే, ఈ స్టాక్‌ ఈ స్థాయిలో రాణించడానికి కారణం ఏంటన్నది చాలా మందికి అంతుచిక్కడం లేదు. తక్కువ పరిమాణంలో స్టాక్స్‌ని ఆఫర్‌లో ఉంచడం వల్ల డిమాండ్‌ పెరిగి స్టాక్‌ ఎగబాకినట్లు కొంతమంది నిపుణులు విశ్లేషిస్తున్నారు. మరోవైపు ఏఎంటీడీ గ్రూప్‌ కింద ఉన్న ఏఎంటీడీ ఐడియా షేర్లు సైతం గణనీయంగా పుంజుకున్నాయి. జులై 15 నుంచి ఈ కంపెనీ షేరు విలువ 458 శాతం ఎగబాకింది. స్టాక్‌ ఇలా అనూహ్యంగా పెరగడంపై ఏఎంటీడీ డిజిటల్‌ స్పందించింది. స్టాక్‌ ధరను ప్రభావితం చేస్తున్న అనుచిత కార్యకలాపాలేవీ తాము గుర్తించలేదని తెలిపింది.

ఏఎంటీడీ డిజిటల్‌ను కెల్విన్‌ ఛొయ్‌ ముందుకు నడిపిస్తున్నారు. ఈయనపై హాంకాంగ్‌లో నిషేధం కొనసాగుతోంది. కొన్ని కీలక వివరాలు వెల్లడించలేదన్న ఆరోపణలపై ఆయన ఈ నిషేధాన్ని ఎదుర్కొంటున్నారు. ఐదేళ్ల పాటు యూబీఎస్‌లో పనిచేసిన ఆయన 2016లో ఏఎంటీడీలో చేరారు. ప్రపంచ కుబేరుల జాబితాలో 30వ స్థానంలో ఉన్న లి కా-షింగ్‌ నేతృత్వంలోని సీకే హచిసన్‌ హోల్డింగ్స్‌ లిమిటెడ్‌.. ఈ ఏఎంటీడీ కంపెనీలకు మాతృసంస్థ. ఏఎంటీడీ గ్రూప్‌లో 32.5 శాతం వాటాలున్న ఏఎంటీడీ డిజిటల్‌కు ఛొయ్‌ ఒక్కరే ప్రమోటర్‌గా ఉన్నారు. హాంకాగ్‌కు చెందిన ఈయనకు కెనడా పౌరసత్వం ఉంది. వాటర్‌లూ యూనివర్శిటీలో అకౌంటింగ్‌లో పట్టాపుచ్చుకున్న ఛొయ్‌.. తర్వాత కార్పొరేట్‌ రంగంలోకి అడుగుపెట్టారు.

Read latest Business News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని